അങ്കമാലി : മുന്നൂർപ്പിള്ളിയിൽ രഘുവിന്റെ കൊലപാതകവുമായി ബന്ധപ്പെട്ട് രണ്ട് പേർ കൂടി അറസ്റ്റിൽ. മൂക്കന്നൂർ ഏഴാറ്റു മുഖം കട്ടിംഗ് ഭാഗത്ത് പള്ളിയാന വീട്ടിൽ ശ്രീജിത്ത് വിജയൻ (27), കട്ടിംഗ് ഭാഗത്ത് പാനിക്കുളം വീട്ടിൽ ജോസഫ് (30) എന്നിവരെയാണ് അങ്കമാലി പോലീസ് അറസ്റ്റ് ചെയ്തത്.
കോയമ്പത്തൂരിൽ ഒളിവിൽ കഴിയുകയായിരുന്നു പ്രതികൾ. സംഭവവുമായി ബന്ധപ്പെട്ട് 11 പേരെ നേരത്തെ അറസ്റ്റ് ചെയ്തിരുന്നു. വിരോധത്തിന്റെ പേരിൽ രഘുവിനെ തട്ടിക്കൊണ്ടുപോയി മർദ്ദിച്ച ശേഷം രഘുവിന്റെ സുഹൃത്തായ സുജിത്തിന്റെ വീടിന് സമീപം ഇറക്കി വിടുകയായിരുന്നു.
അവശനിലയിലായ രഘു സുജിത്തിന്റെ വീട്ടിൽ വച്ചാണ് മരണപ്പെട്ടത്. പ്രധാന പ്രതിയായ സതീഷ് കുന്നപ്പിള്ളി ഭാഗത്ത് വീട് വാടകക്കെടുത്ത് സ്പിരിറ്റ് സൂക്ഷിച്ച് ചാരായം വാറ്റിയിരുന്നു. ഇത് രഘുവും കൂട്ടരും ആരുമറിയാതെ എടുത്ത് ഉപയോഗിക്കുകയും, വിൽപ്പന നടത്തുകയും ചെയ്തിരുന്നുവെന്ന് പറയപ്പെടുന്നു. ഇതാണ് വൈരാഗ്യകാരണമായി ചൂണ്ടിക്കാണിക്കുന്നത്.
ഡിവൈഎസ്പി ടി. ആർ രാജേഷിന്റെ നേതൃത്വത്തിൽ ഇൻസ്പെക്ടർ ആർ .വി അരുൺകുമാർ, എസ്ഐമാരായ കെ. എ വിൽസൻ, കെ. കെ ബഷീർ, സിപിഒമാരായ അജിതാ തിലകൻ, ജിബിൻ കൃഷ്ണൻ, കെ. എസ് മാർട്ടിൻ ,സി. പി ഷിഹാബ്, പി. എ നൗഫൽ എന്നിവരാണ് അന്വേഷണ സംഘത്തിലുള്ളത്.
പ്രതികരിക്കാൻ ഇവിടെ എഴുതുക: