മൂവാറ്റുപുഴ (കൊച്ചി): കൈക്കൂലി കേസില്‍ മുന്‍ മൂവാറ്റുപുഴ ആര്‍ഡിഒക്ക് ഏഴ് വര്‍ഷം കഠിനതടവും 35,000 രൂപ പിഴയും ശിക്ഷ വിധിച്ച് മൂവാറ്റുപുഴ വിജിലന്‍സ് കോടതി.
കോട്ടയം കാഞ്ഞിരപ്പിള്ളി പട്ടിമറ്റം വെച്ചുകുന്നേല്‍ വി.ആര്‍. മോഹനന്‍ പിള്ള (63) യെയാണ് വിജിലന്‍സ് ജഡ്ജി എന്‍.വി. രാജു അഴിമതി നിരോധന വകുപ്പ് പ്രകാരം ശിക്ഷിച്ചത്. 2016ല്‍ വാഴക്കുളത്ത് ഇടിഞ്ഞുപോയ സ്ഥലത്തിന്റെ സംരക്ഷണ ഭിത്തി നിര്‍മാണവുമായി ബന്ധപ്പെട്ട കേസില്‍ 50,000 രൂപ കൈക്കൂലി വാങ്ങിയതില്‍ വീട്ടൂര്‍ വരിക്കയില്‍ മാത്യു വി. ഡാനിയേല്‍ നല്‍കിയ പരാതിയിലാണ് പ്രതിയെ ശിക്ഷിച്ചത്.
ഡിവൈഎസ്പി എം.എന്‍. രമേശ് കേസില്‍ അന്വേഷണം നടത്തി എസ്പി അശോക്കൂമാര്‍ കുറ്റപത്രം സമര്‍പ്പിച്ച കേസിലാണ് ശിക്ഷ. അഴിമതി നിരോധന നിയമം 7 പ്രകാരം 3 വര്‍ഷം തടവും 10,000 രൂപ പിഴയും അഴിമതി നിരോധന നിയമം 302 പ്രകാരം 4 വര്‍ഷം തടവും 25,000 രൂപ പിഴയുമാണ് ശിക്ഷ. കോടതി ജാമ്യം തള്ളിയതോടെ പ്രതിയെ മൂവാറ്റുപുഴ സബ് ജയിലിലേക്ക് മാറ്റി. പ്രോസിക്യൂഷനു വേണ്ടി പബ്ലിക് പ്രോസിക്യൂട്ടര്‍ വി.എ. സരിത ഹാജരായി.
പ്രതികരിക്കാൻ ഇവിടെ എഴുതുക: