ബെയ്റൂട്ട് ; ഹമാസ് നേതാവ് യഹ്യ സിൻവാറിന്റെ മരണത്തിൽ പ്രതികരണവുമായി ലൈംഗിക പീഡനക്കേസിൽ അറസ്റ്റിലായ മുൻ കിക്ബോക്സിങ് ലോകചാംപ്യൻ ആൻഡ്ര്യു ടെയ്റ്റ്. സിൻവാറിന്റെ പോലെയുള്ള വീരമൃത്യുവിനുവേണ്ടി മാത്രമാണ് താൻ പ്രാർഥിക്കുന്നതെന്നാണ് ആൻഡ്ര്യു ടെയ്റ്റിന്റെ പ്രതികരണം.
‘ യഹ്യ സിൻവാറിനു സംഭവിച്ച പോലെയുള്ള വീരമൃത്യുവിനു വേണ്ടിമാത്രമാണ് ഞാൻ പ്രാർഥിക്കുന്നത്. ധീരനും തിന്മയ്ക്കു മുന്നിൽ അചഞ്ചലനുമാണ് അദ്ദേഹം. ജീവിതലക്ഷ്യങ്ങൾക്കായി സ്വയം സമർപ്പിച്ചയാൾ. അദ്ദേഹം നിത്യശാന്തി അർഹിക്കുന്നുണ്ട്. അതു നേടിയെടുക്കുകയും ചെയ്തിരിക്കുകയാണ് അദ്ദേഹം.’- എന്നാണ് ടെയ്റ്റ് എക്സിൽ കുറിച്ചത്.
മുൻ യുഎസ് വ്യോമസേനാംഗത്തിന്റെ മകനായ ആൻഡ്യു ടെയ്റ്റ് 2022ൽ ലൈംഗിക പീഡനക്കേസിൽ റൊമാനിയയിൽ അറസ്റ്റിലായിരുന്നു. സ്ത്രീകളെ ലൈംഗികമായി ചൂഷണം ചെയ്യാനായി ക്രിമിനൽ സംഘങ്ങളുണ്ടാക്കിയെന്നും മനുഷ്യക്കടത്ത് നടത്തിയെന്നുമായിരുന്നു പരാതി. അഭിമുഖങ്ങളിൽ സ്ത്രീവിരുദ്ധനാണെന്നാണ് ആൻഡ്യു ടെയ്റ്റ് പറയുന്നത്. അതേസമയം ആൻഡ്യു ടെയ്റ്റിന്റെ പുതിയ പ്രസ്താവനയ്ക്കെതിരെ പരിഹാസവും ഉയരുന്നുണ്ട്.
