പാലക്കാട്: സ്വകാര്യ ബസിന് ഫിറ്റ്നസ് ടെസ്റ്റ് നല്കാത്തതിന് പിന്നാലെ വധഭീഷണി. ഇരിങ്ങാലക്കുട അസിസ്റ്റന്റ് മോട്ടോര് വെഹിക്കിള് ഇന്സ്പെക്ടറുടെ വീട്ടിലെത്തിയാണ് വധഭീഷണി മുഴക്കിയത്. ഇരിങ്ങാലക്കുട സബ് ആര്.ടി. ഓഫീസിലെ അസിസ്റ്റന്റ് മോട്ടോര് വെഹിക്കിള് ഇന്സ്പെക്ടര് കെ.ടി. ശ്രീകാന്തിന്റെ മണ്ണുത്തിയിലെ വീട്ടിലെത്തിയാണ് മൂന്നംഗ അക്രമിസംഘം കഴിഞ്ഞ ദിവസം വധഭീഷണി മുഴക്കിയത്. വെള്ളിയാഴ്ച രാത്രി ഒന്പതിനാണ് കാറില് അക്രമിസംഘം ശ്രീകാന്തിന്റെ മണ്ണുത്തി തിരുവാണിക്കാവിന് സമീപത്തെ വീടിനുമുന്നിലെത്തിയത്. ദേശീയപാതയിലെ സര്വീസ് റോഡിനോടു ചേര്ന്ന വീടിന് മുന്നില്നിന്ന് ഗേറ്റില് ആഞ്ഞുതട്ടിയും മറ്റും ഒരുമണിക്കൂറോളം സംഘം ഭീഷണി മുഴക്കുകയായിരുന്നു. ഈ സമയം വീട്ടില് ശ്രീകാന്തിന് പുറമേ ഗര്ഭിണിയായ ഭാര്യയും പ്രായമായ അമ്മയും സഹോദരിയും രണ്ട് ചെറിയ മക്കളുമാണുണ്ടായിരുന്നത്.
സംഭവം കണ്ട് വീട്ടുകാരെല്ലാം ഭയന്നുവിറച്ചിരിക്കുകയായിരുന്നു. വീടിന്റെ ഗേറ്റ് പൂട്ടിയതിനാലാണ് അക്രമിസംഘം ഉള്ളിലേക്ക് കയറാതിരുന്നതെന്ന് ശ്രീകാന്ത് പറയുന്നു. സംഭവത്തില് മണ്ണുത്തി സ്വദേശി ജെന്സന്, പുത്തൂര് സ്വദേശി ബിജു, നേരിട്ട് കണ്ടാല് തിരിച്ചറിയുന്ന മറ്റൊരാള് എന്നിവരുടെ പേരില് പോലീസ് കേസെടുത്തു. മതിയായ അറ്റകുറ്റപ്പണി നടത്താത്ത സ്വകാര്യബസിന് ഫിറ്റ്നസ് സര്ട്ടിഫിക്കറ്റ് അനുവദിക്കാത്തതിന്റെ വൈരാഗ്യത്തിലാണ് സംഘം തന്റെ വീടിന് മുന്നിലെത്തി ഭീഷണി മുഴക്കിയതെന്ന് ശ്രീകാന്ത് പറഞ്ഞു.
