തമിഴ്‌നാട് മുഖ്യമന്ത്രി സ്റ്റാലിനും കൂട്ടരും രാജ്യത്തിന്റെ ഐക്യം തകർക്കുകയാണ് : ആര്യൻ പരാമർശത്തിനെതിരെ ബിജെപി നേതാവ് നാരായണൻ തിരുപ്പതി

ചെന്നൈ: ഗവർണർ ആർ. എൻ രവിക്കെതിരായ ആര്യൻ പരാമർശത്തിൽ മുഖ്യമന്ത്രി എം. കെ സ്റ്റാലിനെതിരെ ആഞ്ഞടിച്ച് തമിഴ്‌നാട് ബിജെപി വൈസ് പ്രസിഡൻ്റ് നാരായണൻ തിരുപ്പതി. പ്രതിപക്ഷ ഇൻഡി സഖ്യം രാജ്യത്തിന്റെ ഐക്യം തകർക്കുകയാണെന്നും തിരുപ്പതി ആരോപിച്ചു.

എം. കെ സ്റ്റാലിനും അദ്ദേഹത്തിന്റെ മകനും രാജ്യത്തിന്റെ ഐക്യം നശിപ്പിക്കുകയാണ്. ആര്യൻ, ദ്രാവിഡൻ തുടങ്ങിയ വർഗങ്ങളൊന്നുമില്ല, അതെല്ലാം മിഥ്യയാണെന്ന് ബി.ആർ അംബേദ്കർ വ്യക്തമായി പറഞ്ഞതാണ്. ദ്രാവിഡം ഒരു ഭൂപ്രകൃതിയാണെന്നും തിരുപ്പതി പറഞ്ഞു.

കൂടാതെ സ്റ്റാലിനടക്കമുള്ള ആളുകൾ കഴിഞ്ഞ 50-60 വർഷങ്ങളായി പ്രദേശത്തിന്റെയും ജാതിയുടെയും മതത്തിന്റെയും ഭൂപ്രകൃതിയുടെയും പേരിൽ രാജ്യത്തെ വിഭജിക്കാൻ ശ്രമിക്കുകയാണെന്നും അദ്ദേഹം കൂട്ടിച്ചേർത്തു.

ഹിന്ദി ഭാഷ നടപ്പാക്കുന്നതിന്നെ ചൊല്ലി മുഖ്യമന്ത്രിയും ഗവർണറും തമ്മിൽ വാക്പോരും സംസ്ഥാന ഗാനത്തെ ചൊല്ലിയുള്ള തർക്കവും രൂക്ഷമായതിന് പിന്നാലെയാണ് തിരുപ്പതിയുടെ പ്രതികരണം.