കാസര്‍കോട്:ജോലി വാഗ്ദാനം ചെയ്ത് പണം തട്ടിയെന്ന കേസില്‍ ഡിവൈഎഫ്‌ഐ കാസര്‍കോട് ജില്ലാ കമ്മിറ്റി മുന്‍ അംഗം സച്ചിത റേയുടെ മുന്‍കൂര്‍ ജാമ്യാപേക്ഷ കാസര്‍കോട് ജില്ലാ പ്രിന്‍സിപ്പല്‍ സെഷന്‍സ് കോടതി തള്ളി. കേന്ദ്ര തോട്ടവിള ഗവേഷണ കേന്ദ്രത്തില്‍ ജോലി വാഗ്ദാനം ചെയ്ത് കുമ്പള സ്വദേശിനി നിഷ്മിത ഷെട്ടിയില്‍ നിന്ന് 15 ലക്ഷം രൂപ തട്ടിയെന്നാണ് കേസ്.
കേന്ദ്ര തോട്ടവിള ഗവേഷണ കേന്ദ്രത്തില്‍ അസിസ്റ്റന്റ് മാനേജര്‍ തസ്തികയില്‍ ജോലി വാഗ്ദാനം ചെയ്താണ് ബല്‍ത്തക്കല്ല് സ്വദേശിനി സച്ചിത റേ തട്ടിപ്പ് നടത്തിയത്. കര്‍ണാടക സ്വദേശി ചന്ദ്രശേഖര കൂളൂരിന് ഈ പണം താന്‍ കൈമാറിയെന്ന് പ്രതി വാദമുന്നയിച്ചെങ്കിലും കോടതി പരിഗണിച്ചില്ല. മഞ്ചേശ്വരം ബഡൂരിലെ സ്‌കൂളില്‍ അധ്യാപികയാണ് സച്ചിതാ റേ.
കുമ്പള കിദൂര്‍ സ്വദേശിനി നിഷ്മിത ഷെട്ടിയുടെ പരാതിയില്‍ പൊലീസ് കേസെടുത്ത് അന്വേഷണം നടത്തവെയാണ് മുന്‍കൂര്‍ ജാമ്യേപേക്ഷയുമായി സച്ചിത റേ കോടതിയെ സമീപിച്ചത്. പല തവണകളായിട്ടായിരുന്നു നിഷ്മിത ഷെട്ടി പണം നല്‍കിയത്. ജോലി ലഭിക്കാത്ത പശ്ചാത്തലത്തില്‍ കേന്ദ്ര തോട്ടവിള ഗവേഷണ കേന്ദ്രത്തില്‍ അന്വേഷിച്ചപ്പോഴാണ് തട്ടിപ്പ് തിരിച്ചറിഞ്ഞതും പരാതി നല്‍കിയതും. സച്ചിത റേ മുങ്ങിയെന്നാണ് പൊലീസ് കണ്ടെത്തല്‍.
പ്രതികരിക്കാൻ ഇവിടെ എഴുതുക: