കണ്ണൂര്‍: എഡിഎം നവീന്‍ ബാബുവിന്റെ യാത്രയയപ്പ് യോഗത്തിലേക്ക് ജില്ലാ പഞ്ചായത്ത് പ്രസിഡണ്ട് പി പി ദിവ്യ എത്തിയത് വീഡിയോഗ്രാഫറെ ഏര്‍പ്പെടുത്തിയ ശേഷമെന്ന വാര്‍ത്ത പുറത്തുവരുന്നു. താന്‍ നവീന്‍ ബാബുവിനെ അധിക്ഷേപിക്കുന്നത് വീഡിയോയില്‍ പകര്‍ത്തുകയും അത് രാത്രി തന്നെ മാധ്യമപ്രവര്‍ത്തകര്‍ക്കും ചാനലുകള്‍ക്കും എത്തിക്കുകയുമായിരുന്നു. ചില പത്രങ്ങളിലും ചാനലുകളിലും അത് വാര്‍ത്തയാവുകയും ചെയ്തു. എഡിഎമ്മിനെ അപമാനിക്കാന്‍ കരുതിക്കൂട്ടി എത്തിയതാണ് ദിവ്യ എന്നത് സംഭവത്തിന്റെ ഗൗരവം വര്‍ധിപ്പിക്കുന്നു. കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന യാത്രയയപ്പ് യോഗത്തില്‍ റവന്യൂ സ്റ്റാഫിന് മാത്രമായിരുന്നു ക്ഷണം ഉണ്ടായിരുന്നത്. ജില്ലാ കളക്ടറുടെ അധ്യക്ഷതയില്‍ ചേര്‍ന്ന യോഗത്തില്‍ പിആര്‍ഡിയിലേതടക്കം മാധ്യമപ്രവര്‍ത്തകരാരും ഉണ്ടായിരുന്നില്ല എന്നാണ് അറിയുന്നത്. ഇത് ഒരു ചെറിയ ചടങ്ങ് ആണെന്നും മാധ്യമങ്ങളില്‍ വാര്‍ത്തയാകാന്‍ സാധ്യതയില്ലെന്നും തിരിച്ചറിഞ്ഞ ദിവ്യ തന്റെ അധിക്ഷേപം പകര്‍ത്താന്‍ വീഡിയോഗ്രാഫറെ ഒപ്പം കൂട്ടുകയായിരുന്നു. ഇയാള്‍ ഇതെല്ലാം വേണ്ടവിധം പകര്‍ത്തി ദിവ്യക്ക് കൈമാറുകയും മാധ്യമങ്ങളില്‍ എത്തിച്ചുകൊടുക്കുകയും ചെയ്തു എന്നാണ് അറിയുന്നത്.
തന്റെ വരുതിയില്‍ നില്‍ക്കാത്ത ഉദ്യോഗസ്ഥനെ പോകുന്ന പോക്കിന് എത്രമാത്രം അപമാനിക്കാമോ അത്രയും അപമാനിക്കുകയായിരുന്നു ദിവ്യയുടെ ലക്ഷ്യം. തന്റെ നീചമായ ലക്ഷ്യം സാധിച്ച ഗൂഢസ്മിതത്തോടെയാണ് ദിവ്യ വേദി വിട്ടിറങ്ങുന്നത് എന്നത് വീഡിയോയില്‍ വ്യക്തമാണ്. എത്രമാത്രം കൊടിയ വിഷമാണ് ജില്ലാ പഞ്ചായത്ത് പ്രസിഡന്റിന്റെ ഉള്ളിലുണ്ടായിരുന്നത് എന്നത് മനുഷ്യമനസാക്ഷിയെ ഞെട്ടിക്കുന്നതാണ്.
പ്രതികരിക്കാൻ ഇവിടെ എഴുതുക: