കൊച്ചി: രാജ്യത്ത് നിന്ന് തെക്ക് പടിഞ്ഞാറന് മണ്സൂണ് വിടവാങ്ങിയതായും പിന്നാലെ തന്നെ വടക്ക് കിഴക്കന് മണ്സൂണ് എത്തിയതായും കേന്ദ്ര അന്തരീക്ഷ ശാസ്ത്ര കേന്ദ്രം. ഇരട്ട ന്യൂനമര്ദം ശക്തമായതാണ് വേഗത്തില് മഴ എത്താന് കാരണം. ഒരു ദിവസം കൊണ്ട് മഹാരാഷ്ട്ര, കര്ണാടക, കേരളം, തമിഴ്നാട് എന്നിവിടങ്ങളില് നിന്ന് കാലവര്ഷം വിടവാങ്ങുകയും രാജ്യത്തിന്റെ തെക്ക് കിഴക്കന് മേഖലയില് തുലാമഴ എത്തുകയും ചെയ്തു. കഴിഞ്ഞ വര്ഷം 16ന് ആയിരുന്നു രാജ്യത്ത് തുലാമഴ എത്തിയത്.
സംസ്ഥാനത്തും ഈ വാരം മഴ തുടരും. ഇടിയോട് കൂടിയ ഇടത്തരം മഴയ്ക്കാണ് പരക്കെ സാധ്യത. ഒറ്റപ്പെട്ടയിടങ്ങളില് മഴ കൂടുതല് ശക്തമാകും. മലപ്പുറം, കണ്ണൂര് ജില്ലകളില് ഓറഞ്ച് അലര്ട്ടും കാസര്കോട്, വയനാട്, കോഴിക്കോട്, പാലക്കാട്, തൃശ്ശൂര്, ഇടുക്കി, എറണാകുളം, കോട്ടയം, ആലപ്പുഴ, പത്തനംതിട്ട ജില്ലകളില് യെല്ലോ അലര്ട്ടുണ്ട്.
രണ്ട് ദിവസമായി സംസ്ഥാനത്തെ ആകാശം ഭാഗികമായി മൂടിയ നിലയിലാണ്. ബംഗാള് ഉള്ക്കടലിലും അറബിക്കടലിലുമായി തുടരുന്ന ഇരട്ട ന്യൂനമര്ദങ്ങളാണ് ഇതിന് കാരണം. ബംഗാള് ഉള്ക്കടലിന്റെ തെക്കന് മധ്യമേഖലയില് തുടരുന്ന ന്യൂനമര്ദം കൂടുതല് ശക്തമായി ഇന്ന് രാവിലെയോടെ തീവ്രമാകും. ഇത് പിന്നീട് പടിഞ്ഞാറ്, വടക്ക് പടിഞ്ഞാറ് ദിശയില് നീങ്ങി തെക്കന് തമിഴ്നാട്, വടക്കന് ആന്ധ്രാ തീരത്തെത്തും. അറബിക്കടലിന്റെ പടിഞ്ഞാറന് മധ്യമേഖലയില് തുടരുന്ന തീവ്രന്യൂനമര്ദം വടക്ക്പടിഞ്ഞാറ് ദിശയില് നീങ്ങുകയാണ്. ഇതിന്റെ ശക്തി ഇന്ന് രാവിലെയോടെ കുറയുമെന്നാണ് പ്രവചനം. ഇതിനൊപ്പം തെക്കന് ആന്ധ്രാപ്രദേശ് തീരത്ത് അന്തരീക്ഷച്ചുഴിയും തുടരുകയാണ്. ചെന്നൈ, ബെംഗളൂരു അടക്കമുള്ള സ്ഥലങ്ങളിലും തമിഴ്നാട്ടില് വ്യാപകമായും മഴയ്ക്ക് ഇവ കാരണമാകും.
