മുംബൈ: ബാബ സിദ്ദിഖിയുടെ കൊലപാതകത്തിനെ തുടര്‍ന്ന് ബോളിവുഡ്താരം സല്‍മാന്‍ ഖാന്റെ സുരക്ഷ വര്‍ധിപ്പിച്ചു. സല്‍മാന്‍ ഖാനുമായി സിദ്ദിഖിക്ക് അടുപ്പമുണ്ടായിരുന്നതാണ് കൊലപാതകത്തിനുള്ള കാരണമായി ബിഷ്ണോയി സംഘം അറിയിച്ചിരുന്നു. ഇതിന്റെ പശ്ചാത്തലത്തിലാണ് സുരക്ഷ വര്‍ധിപ്പിച്ചത്.
ബാന്ദ്രയിലെ അദ്ദേഹത്തിന്റെ ഗാലക്സി അപ്പാര്‍ട്ട്മെന്റില്‍ സുരക്ഷാ ഉദ്യോഗസ്ഥരുടെ എണ്ണം കൂട്ടി. ബോളിവുഡിലെ സുഹൃത്തുക്കളോട് ഇപ്പോള്‍ അദ്ദേഹത്തെ സന്ദര്‍ശിക്കരുതെന്നും കുടുംബം അഭ്യര്‍ത്ഥിച്ചിട്ടുണ്ട്. മാസങ്ങള്‍ക്ക് മുമ്പ് സല്‍മാന്‍ ഖാന്റെ മുംബൈയിലെ വീടിനു നേരെ വെടിയുതിര്‍ത്തതിന് പിന്നിലും ബിഷ്ണോയി സംഘമാണ്. സല്‍മാന്റെ സഹോദരങ്ങളായ അര്‍ബാസ് ഖാന്, സൊഹൈല്‍ ഖാന് എന്നിവരുമായും സിദ്ദിഖിക്ക് ഏറെ അടുപ്പമുണ്ടായിരുന്നു.
ശനിയാഴ്ച രാത്രിയാണ് ബാബാ സിദ്ദിഖിയെ വെടിവെച്ചു കൊന്നത്. സംഭവത്തിന് പിന്നില്‍ ബിഷ്‌ണോയ് സംഘം ആണോയെന്ന് പോലീസ് അന്വേഷണം നടത്തി വരികയായിരുന്നു. അതിനിടെ ഗുണ്ടാ സംഘം സമൂഹ മാധ്യമങ്ങളിലൂടെ കൊലപാതകത്തിന്റെ ഉത്തരവാദിത്തം ഏറ്റെടുത്തു.
സംഭവം നടന്ന് മണിക്കൂറുകള്‍ക്ക് ശേഷം ഷിബു ലോങ്കറിന്റെ അക്കൗണ്ടുമായി ലിങ്ക് ചെയ്തുകൊണ്ടുള്ള പോസ്റ്റിലാണ് ബിഷ്ണോയി സംഘം കൊലപാതകത്തിന്റെ ഉത്തരവാദിത്തം ഏറ്റെടുത്തത്.
പ്രതികരിക്കാൻ ഇവിടെ എഴുതുക: