തൃശ്ശൂര് : ജാതിമതഭേദമന്യേ ആര്എസ്എസിന്റെ മനുഷ്യ നന്മയിലൂന്നിയ പ്രവര്ത്തനവും അച്ചടക്കവും മാതൃകാപരമെന്ന് സംഗീത സംവിധായകന് ഔസേപ്പച്ചന്. തൃശ്ശൂരിലെ വിജയദശമി പരിപാടിയില് അധ്യക്ഷത വഹിച്ചു സംസാരിക്കുകയായിരുന്നു അദ്ദേഹം.
നാട് നന്നാവാന് ആദ്യം സ്വയം നന്നാവണം. ആരോഗ്യമുണ്ടാകണം, അച്ചടക്കമുണ്ടാവണം. അത്തരം വ്യക്തികളെ സൃഷ്ടിക്കാനാണ് ആര്എസ്എസ് പരിശ്രമം എന്നാണ് മനസ്സിലാക്കുന്നത്. സ്വന്തം കാര്യങ്ങള് മാറ്റിവച്ച് രാജ്യത്തിനും സമൂഹത്തിനും വേണ്ടി നടത്തുന്ന പ്രവര്ത്തനം മഹത്തരമാണ്. താന് ആദ്യമായാണ് സംഘത്തിന്റെ പരിപാടിയില് പങ്കെടുക്കുന്നതെന്നും ഔസേപ്പച്ചന് പറഞ്ഞു.
പ്രധാനമന്ത്രി നരേന്ദ്ര മോദി ഈ പ്രായത്തിലും യോഗ അഭ്യസിക്കുന്നതും ഊര്ജ്ജസ്വലമായി പെരുമാറുന്നതും കണ്ട് അതിശയം തോന്നിയിട്ടുണ്ട്. ഈ സംഘടനയുടെ പ്രവര്ത്തന പാരമ്പര്യം ആകാം അദ്ദേഹത്തിന് ഈ കരുത്ത് നല്കുന്നതെന്നും ഔസേപ്പച്ചന് പറഞ്ഞു. സംഘത്തിന്റെ പ്രവര്ത്തനത്തിലൂടെ കടന്നുവന്നതുകൊണ്ടാണ് അദ്ദേഹത്തിന് ഇത്രയും ഊര്ജ്ജം ലഭിച്ചതെന്നാണ് കരുതുന്നത്. 45 വര്ഷമായി യോഗ ചെയ്യുന്ന ആളാണ് താനെന്നും ഔസേപ്പച്ചന് പറഞ്ഞു.
