തിരുവനന്തപുരം: ഇന്ഡി സഖ്യത്തിന്റെ കുപ്രചാരണങ്ങള്ക്ക് ജനം ഹരിയാന, ജമ്മു കശ്മീര് തെരഞ്ഞെടുപ്പിലൂടെ മറുപടി നല്കിയെന്ന് മുന് കേന്ദ്രമന്ത്രി വി. മുരളീധരന്.
രാഹുല് ഗാന്ധിയും കെ.സി. വേണുഗോപാലുമെല്ലാം ചേര്ന്ന് തുറക്കാന് ശ്രമിച്ച നുണയുടെ കട, ജനം അടപ്പിച്ചെന്നും മുരളീധരന് പറഞ്ഞു. സൈനികരും കര്ഷകരുമെല്ലാം മോദി വിരുദ്ധരെന്ന് ഇന്ഡി സഖ്യം പ്രചരിപ്പിച്ചു. കശ്മീരിലും ബിജെപിയുടെ ജനകീയ അടിത്തറയ്ക്ക് ബലം കൂടുകയാണ്. കോണ്ഗ്രസ് പിന്നോട്ട് പോയി. കേന്ദ്ര സര്ക്കാര് നയം കശ്മീരിനെ കൂടുതല് സുരക്ഷിതമാക്കിയെന്നും അദ്ദേഹം ചൂണ്ടിക്കാട്ടി.
ഹരിയാനയില് ഹാട്രിക് വിജയം സ്വന്തമാക്കിയതിലും ജമ്മുകശ്മീരില് ഏറ്റവും വലിയ ദേശീയരാഷ്ട്രീയ പാര്ട്ടിയായി മാറി നിലമെച്ചപ്പെടുത്തിയതിലും ബിജെപി സംസ്ഥാന ഓഫീസില് ആഘോഷം. മുദ്രാവാക്യം വിളിച്ചും ചെണ്ടമേളം മുഴക്കിയും മധുരം വിതരണം ചെയ്തും ആകാശക്കാഴ്ചയൊരുക്കിയും മധുരംവിതരണം ചെയ്തുമായിരുന്നു ആഘോഷം.
മുന് കേന്ദ്രമന്ത്രി വി. മുരളീധരന് ജില്ലാപ്രസിഡന്റ് വി.വി.രാജേഷിന് മധുരം നല്കി. സംസ്ഥാന വൈസ്പ്രസിഡന്റ് സി.ശിവന്കുട്ടി, സെക്രട്ടറി എസ്.സുരേഷ്, ജില്ലാ വൈസ്പ്രസിഡന്റ് ആര്.എസ്.രാജീവ് തുടങ്ങിയവര് നേതൃത്വം നല്കി.
