കാസര്കോട്: പൊലീസ് പിടിച്ചെടുത്ത ഓട്ടോറിക്ഷ വിട്ടു നല്കാത്തതില് മനം നൊന്ത് ഓട്ടോ ഡ്രൈവര് ആത്മഹത്യ ചെയ്തെന്ന് പരാതി. റെയില്വേ സ്റ്റേഷന് പരിസരത്ത് ഓട്ടോ ഓടിക്കുന്ന അബ്ദുല് സത്താറിനെ(5) ആണ് താമസ സ്ഥലത്ത് തൂങ്ങി മരിച്ച നിലയില് കണ്ടെത്തിയത്.ഓട്ടോഡ്രൈവര് മാര് പൊലീസ് സ്റ്റേഷന് മുന്നില് പ്രതിഷേധ സമരം നടത്തി.
റെയില്വേ സ്റ്റേഷന് സമീപത്തെ താമസ സ്ഥലത്താണ് അബ്ദുല് സത്താറിനെ തൂങ്ങി മരിച്ച നിലയില് കണ്ടെത്തിയത്. നെല്ലിക്കുന്ന് ജംഗ്ഷനില് ട്രാഫിക് തടസമുണ്ടാക്കിയതിന് കഴിഞ്ഞ വ്യാഴാഴ്ച ഇദ്ദേഹത്തിന്റെ ഓട്ടോ കാസര്കോട് പൊലീസ് പിടികൂടിയിരുന്നു.ഓട്ടോ മടക്കി കിട്ടണമെന്ന ആവശ്യവുമായി നിരവധി തവണ പൊലീസ് സ്റ്റേഷനില് എത്തിയെങ്കിലും എസ്ഐ അതിന് തയാറായില്ലെന്നാണ് പരാതി.
ഓട്ടോറിക്ഷ വിട്ട് നല്കാത്തതിനെ കുറിച്ച് അബ്ദുല് സത്താര് ഫെയ്സ്ബുക്കില് വീഡിയോ പങ്കുവച്ചതിന് ശേഷം ആത്മഹത്യ ചെയ്യുകയായിരുന്നുവെന്നാണ് ഓട്ടോഡ്രൈവര് മാര് പറയുന്നത്. ഓട്ടോ ഡ്രൈവര്മാരുടെ പ്രതിഷേധത്തിന് പിന്നാലെ ആരോപണ വിധേയനായ എസ്ഐ അനൂപിനെ ചന്ദേര പൊലീസ് സ്റ്റേഷനിലേക്ക് ജില്ലാ പൊലീസ് മേധാവി ഡി ശില്പ സ്ഥലം മാറ്റി. പരാതി ജില്ലാ ക്രൈംബ്രാഞ്ച് അന്വേഷിക്കുമെന്ന് ജില്ലാ പൊലീസ് മേധാവി അറിയിച്ചു.
