തിരുവനന്തപുരം: സംവിധായകനും നടനുമായ ബാലചന്ദ്രമേനോനെതിരേ ലൈംഗിക പീഡന പരാതി. ‘ദേ ഇങ്ങോട്ട് നോക്കിയെ’ എന്ന സിനിമയുടെ സെറ്റില്‍വച്ച് ലൈംഗിക അതിക്രമം നടത്തിയെന്നാണ് ആരോപണം. മുകേഷ് അടക്കമുള്ള നടന്മാർക്കെതിരെ പരാതി നൽകിയ ആലുവ സ്വദേശിനിയായ നടിയാണ് ബാലചന്ദ്ര മേനോനെതിരെയും പ്രത്യേക അന്വേഷണ സംഘത്തിന് മുന്നിൽ പരാതി നൽകിയത്.
2007 ജനുവരിയിലാണ് സംഭവം. തിരുവനന്തപുരത്തെ ഹോട്ടല്‍മുറിയിലേക്ക് തന്നെ വിളിച്ചുവരുത്തി ഗ്രൂപ്പ് സെക്സിന് നിർബന്ധിച്ചു. ഇവിടെയെത്തിയപ്പോള്‍ 18 വയസുകാരിയുടെ വസ്ത്രമഴിക്കാന്‍ ബാലചന്ദ്രമേനോന്‍ ശ്രമിക്കുന്നതാണ് താന്‍ കണ്ടതെന്ന് പരാതിയില്‍ പറയുന്നു. ഇതോടെ അവിടെനിന്ന് മടങ്ങിയ തന്നെ പിന്നീട് തന്റെ മുറിയിലെത്തിയ ബാലചന്ദ്രമേനോന്‍ കടന്നുപിടിച്ചെന്നും പീഡിപ്പിച്ചെന്നുമാണ് പരാതി.
പുറത്ത് പറഞ്ഞാൽ ചിത്രീകരിച്ച സിനിമാ രംഗങ്ങൾ ഒഴിവാക്കുമെന്നും ഭീഷണിപ്പെടുത്തി. ബാലചന്ദ്രമേനോനെതിരേ നേരത്തേ പരാതി നല്‍കാതിരുന്നത് ഭയം മൂലമാണെന്നും നടി വ്യക്തമാക്കി. നേരത്തെ ആലുവ സ്വദേശിയായ ഈ നടിയും അഭിഭാഷകനും ബ്ലാക്മെയിൽ ചെയ്തെന്നാരോപിച്ച് ബാലചന്ദ്രമേനോൻ സംസ്ഥാന പൊലീസ് മേധാവിക്കും മുഖ്യമന്ത്രിക്കും പരാതി നൽകിയിരുന്നു. അഭിഭാഷകൻ ബ്ലാക്മെയിൽ ചെയ്തെന്നാണ് പരാതി. മൂന്ന് ലൈംഗിക ആരോപണങ്ങൾ ഉടൻ വരുമെന്നായിരുന്നു ഫോണിലൂടെയുള്ള ഭീഷണി. അടുത്തദിവസം നടി സമൂഹമാധ്യമങ്ങളിൽ ഇക്കാര്യം സൂചിപ്പിച്ച് പോസ്റ്റിട്ടതായും പരാതിയിൽ പറയുന്നു.
പ്രതികരിക്കാൻ ഇവിടെ എഴുതുക: