ഇസ്താംബുള്‍: സ്വയം വിവാഹം ചെയ്ത് സാമൂഹിക മാധ്യമങ്ങളില്‍ ശ്രദ്ധനേടിയ സോഷ്യല്‍ മീഡിയ ഇന്‍ഫ്ളുവന്‍സര്‍ ആത്മഹത്യ ചെയ്തു. തുര്‍ക്കിയിലെ ടിക് ടോക് താരമായ കുബ്ര അക്യുതും കെട്ടിടത്തില്‍നിന്ന് ചാടി ജീവനൊടുക്കുകയായിരുന്നു. സുല്‍ത്താന്‍ബെയ്ലി ജില്ലയിലെ അപ്പാര്‍ട്ട്മെന്റ് കെട്ടിടത്തിന്റെ അഞ്ചാംനിലയില്‍നിന്നാണ് കുബ്ര ചാടിയത്. ആത്മഹത്യാക്കുറിപ്പ് പോലീസ് കണ്ടെടുത്തു.
ടിക് ടോക്കില്‍ ഒരു മില്യണിലേറെ ഫോളോവേഴ്സുണ്ടായിരുന്നു കുബ്രയ്‌ക്ക്. ഇന്‍സ്റ്റഗ്രാമില്‍ രണ്ടരലക്ഷത്തോളം പേരും ഫോളോ ചെയ്തിരുന്നു. അനുയോജ്യനായ വരനെ കിട്ടുന്നില്ലെന്നു പറഞ്ഞ് കഴിഞ്ഞവര്‍ഷം സ്വയം വിവാഹംചെയ്തെന്ന് കുബ്ര പ്രഖ്യാപിച്ചത് വാര്‍ത്തയായിരുന്നു. കുബ്ര പങ്കുവെച്ച വിവാഹചടങ്ങിന്റെ ചിത്രങ്ങളും വീഡിയോകളും വൈറലായിരുന്നു.
ശരീരഭാരം കുറയുന്നത് സംബന്ധിച്ച ആശങ്കയാണ് കുബ്ര അവസാനം സോഷ്യല്‍മീഡിയയില്‍ പങ്കുവച്ചത്. എനിക്ക് എന്റെ ഊര്‍ജം നേടാനായി. എന്നാല്‍ ഭാരം കൂട്ടാനായില്ല. ദിവസവും ഓരോ കിലോഗ്രാം ഭാരം കുറയുകയാണ്. എന്തുചെയ്യണമെന്ന് അറിയില്ല. അടിയന്തരമായി എനിക്ക് ശരീരഭാരം വര്‍ധിപ്പിക്കണം, എന്നായിരുന്നു കുറിപ്പ്.
പ്രതികരിക്കാൻ ഇവിടെ എഴുതുക: