നിലമ്പൂര്: മുഖ്യമന്ത്രിയും സിപിഎമ്മും തള്ളിപ്പറഞ്ഞതിന് പിന്നാലെ ന്യൂനപക്ഷക്കാര്ഡിറക്കി പി.വി. അന്വര് എംഎല്എ രംഗത്ത്. നിലമ്പൂരില് ഉള്പ്പെടെ സിപിഎം ഏരിയ കമ്മിറ്റികളുടെ നേതൃത്വത്തില് അരങ്ങേറിയ പ്രതിഷേധ പ്രകടനങ്ങളില് അന്വറിനെതിരെ പ്രകോപന മുദ്രാവാക്യങ്ങള് മുഴങ്ങിയിരുന്നു. ഈ സാഹചര്യത്തില് പാര്ട്ടിക്കൊപ്പം നില്ക്കുന്ന മുസ്ലിം സമുദായത്തെ കൂടെ നിര്ത്താനുള്ള ശ്രമമാണ് അന്വറിന്റേത്.
താന് അഞ്ചുനേരം നിസ്ക്കരിക്കുന്ന മുസ്ലിം ആണെന്നും, അതാണ് തന്റെ ശക്തിയെന്നും അന്വര് പറഞ്ഞു. എന്നാല് സിപിഎം മലപ്പുറം ജില്ലാ സെക്രട്ടറി ഇ.എന്. മോഹന്ദാസിന് താന് നിസ്കരിക്കുന്നത് ഇഷ്ടമല്ലെന്നും അന്വര് ചൂണ്ടിക്കാട്ടി. മുസ്ലിം വിരോധിയാണ് മോഹന്ദാസ്. മതന്യൂനപക്ഷങ്ങള്ക്ക് ഫണ്ട് കൊടുക്കലല്ല സര്ക്കാര് നിലപാടെന്ന് പറഞ്ഞ അദ്ദേഹത്തിന് ക്രിസ്ത്യന് ന്യൂനപക്ഷങ്ങളോടും എതിര്പ്പാണ്.
മുന് എസ്പി സുജിത് ദാസിന്റെ പ്രിയപ്പെട്ടവന്. രാഷ്ട്രീയ നെക്സസിന്റെ ഭാഗം എന്നിങ്ങനെയും മോഹന്ദാസിനെ അന്വര് വിശേഷിപ്പിച്ചു. താന് നിയമസഭയിലേക്ക് പോകരുതെന്ന് ആഗ്രഹിച്ച ആളാണ് അദ്ദേഹം. മുഖ്യമന്ത്രി ഉള്പ്പെടെ ആരും അന്ന് പ്രചാരണത്തിന് എത്തിയിരുന്നില്ല. ഇന്ന് നിലമ്പൂരില് ഇക്കാര്യങ്ങളെക്കുറിച്ച് ആളുകളോട് വിശദമായി സംസാരിക്കുമെന്നും അന്വര് വ്യക്തമാക്കി.
