ബെംഗളൂരുവിലെ താജ് വെസ്റ്റ് എൻഡ് ഹോട്ടലിന് ബോംബ് ഭീഷണി ; അന്വേഷണം ആരംഭിച്ച് പോലീസ്

ബംഗളൂരു: ബംഗളൂരുവിലെ ഏറെ പ്രശസ്തമായ താജ് വെസ്റ്റ് എൻഡ് ഹോട്ടലിന് ബോംബ് ഭീഷണി. ശനിയാഴ്ച അജ്ഞാതർ ഇമെയിലിലൂടെ ഭീഷണി മുഴക്കിയതായി പോലീസ് ഉദ്യോഗസ്ഥർ അറിയിച്ചു.

വിവരമറിഞ്ഞ് ലോക്കൽ പോലീസും ബോംബ് സ്ക്വാഡും സംഭവസ്ഥലത്തെത്തി വിശദമായ അന്വേഷണം നടത്തിയതായി സെൻട്രൽ ബെംഗളൂരു ഡെപ്യൂട്ടി പോലീസ് കമ്മീഷണർ എച്ച്.ടി ശേഖർ പറഞ്ഞു. താജ് വെസ്റ്റ് എൻഡ് ഒരു ഹെറിറ്റേജ് ഹോട്ടലാണ്.

താജ് ഗ്രൂപ്പിന്റെ ബിസിനസ് ഹോട്ടൽ വിഭാഗത്തിന് കീഴിൽ വരുന്ന 133 വർഷം പഴക്കമുള്ള ഈ ഹോട്ടൽ നഗരത്തിലെ ഏറ്റവും പഴക്കമുള്ള ഹോട്ടലായി കണക്കാക്കപ്പെടുന്നു. പ്രമുഖ രാഷ്‌ട്രീയക്കാർക്കും ക്രിക്കറ്റ് താരങ്ങൾക്കും ആതിഥേയത്വം വഹിക്കുന്നതും ഈ ഹോട്ടലാണ്.

അതേ സമയം ഭീഷണി വ്യാജമാണോ എന്നറിയാനുള്ള ശ്രമത്തിലാണ് അധികൃതർ. ഇമെയിലിന് പിന്നിൽ പ്രവർത്തിച്ചവർക്കായി തിരച്ചിൽ നടത്തുന്നുണ്ട്. അന്വേഷണം പുരോഗമിക്കുന്നതിനനുസരിച്ച് മാത്രമെ കൂടുതൽ വിവരങ്ങൾ ലഭിക്കുകയുള്ളു.