മലപ്പുറം:മുഖ്യമന്ത്രിക്കും സര്‍ക്കാരിനുമെതിരെ അതിരൂക്ഷ വിമര്‍ശനങ്ങളുമായി രംഗത്ത് വന്ന പി വി അന്‍വര്‍ എം എല്‍ എയെ പ്രതിരോധിക്കാന്‍ രംഗത്തിറങ്ങണമെന്ന സംസ്ഥാന സെക്രട്ടറി എം വി ഗോവിന്ദന്റെ ആഹ്വാനത്തിന് പിന്നാലെ സിപിഎം പ്രവര്‍ത്തകര്‍ തെരുവിലിറങ്ങി പ്രകടനങ്ങള്‍ നടത്തി. മലപ്പുറത്തും നിലമ്പൂരിലും എടക്കരയിലും സിപിഎം പ്രവര്‍ത്തകര്‍ പിവി അന്‍വറിനെതിരെ പ്രതിഷേധ പ്രകടനം നടത്തി.
പാര്‍ട്ടി ഏരിയ കമ്മിറ്റിയുടെ നേതൃത്വത്തിലാണ് പ്രതിഷേധ പ്രകടനങ്ങള്‍ നടന്നത്. ചെങ്കൊടി തൊട്ട് കളിക്കേണ്ടെന്ന മുദ്രാവക്യങ്ങളോടെ അന്‍വറിനെതിരെ ബാനര്‍ ഉയര്‍ത്തി പിടിച്ചാണ് പ്രതിഷേധം.ഗോവിന്ദന്‍ മാഷ് ഒന്ന് ഞൊടിച്ചാല്‍ കൈയും കാലും വെട്ടിയെടുത്തു പുഴയില്‍ തള്ളും എന്ന മുദ്രാവാക്യവും നിലമ്പൂരിലെ പ്രതിഷേധ പ്രകടനത്തിനിടെ ഉയര്‍ന്നു.
നിലമ്പൂരില്‍ പിവി അന്‍വറിന്റെ കോലവും കത്തിച്ചു. രാഷ്‌ട്രീയ വിശദീകരണ യോഗവും നടന്നു. പ്രകടനത്തില്‍ അന്‍വറുമായി അടുത്ത ബന്ധമുള്ള പ്രവര്‍ത്തകരും പങ്കാളികളായി. കോഴിക്കോടും പ്രതിഷേധ പ്രകടനം നടന്നു.
അന്‍വര്‍ കുലം കുത്തിയാണെന്നും തെമ്മാടിയാണെന്നും മുദ്രവാക്യം വിളികളുയര്‍ന്നു. പൊന്നേ എന്ന് വിളിച്ച നാവില്‍ പോടാ എന്ന് വിളിക്കാനറിയാം. കക്കാനും മുക്കാനും വണ്‍മാന്‍ഷോ നടത്താനും പാര്‍ട്ടിയെ ഉപയോഗിച്ചു. അത് നടക്കാതെ പാര്‍ട്ടിയെ തള്ളിപ്പറഞ്ഞുവെന്നും മുദ്രാവാക്യം വിളികളുയര്‍ന്നു.
പ്രതികരിക്കാൻ ഇവിടെ എഴുതുക: