കരുനാഗപ്പള്ളി: മാതാ അമൃതാനന്ദമയി ദേവിയുടെ എഴുപത്തൊന്നാമത് ജന്മദിനം ഇന്ന്. വയനാട് ദുരന്തത്തിന്റെ പശ്ചാത്തലത്തില് അമൃതപുരിയിലെ പതിവ് ആഘോഷങ്ങളും വിശിഷ്ടാതിഥികളെ ക്ഷണിച്ചുള്ള ചടങ്ങുകളും ഒഴിവാക്കി. വയനാടിന് സാങ്കേതിക-പുനരധിവാസ സഹായമായി 15 കോടി രൂപയുടെ പദ്ധതികള് ആവിഷ്കരിക്കുമെന്ന്മാതാ അമൃതാനന്ദമയി മഠം വൈസ് ചെയര്മാന് സ്വാമി അമൃത സ്വരൂപാനന്ദപുരി പറഞ്ഞു.
ദുരന്തത്തിലെ അതിജീവിതര്ക്ക് കൈത്താങ്ങാകുന്നതിനൊപ്പം ദുരന്ത സാധ്യതാ മേഖലകളില് പ്രകൃതി ദുരന്തത്തിന്റെ വ്യാപ്തി ഭാവിയില് കുറയ്ക്കാനുതകുന്ന സംവിധാനങ്ങള് സ്ഥാപിക്കാനും ഈ തുക വിനിയോഗിക്കും.
അമൃത സര്വകലാശാലയുടെ സഹായത്തോടെ മാതാ അമൃതാനന്ദമയി മഠം കാലാവസ്ഥാ വ്യതിയാനം മൂലം കനത്ത പ്രകൃതി ദുരന്തങ്ങള് ആവര്ത്തിച്ചേക്കാവുന്ന വയനാടിന്റെ പരിസ്ഥിതിലോല മേഖലകളില് ഉരുള്പൊട്ടല് മുന്നറിയിപ്പു നല്കുന്ന ശാസ്ത്രീയ സംവിധാനം സ്ഥാപിക്കും. സംസ്ഥാന സര്ക്കാര് അനുമതി ലഭിക്കുന്ന മുറയ്ക്ക് പ്രവര്ത്തനങ്ങള് ആരംഭിക്കും. ഇത് എത്രയും വേഗം ലഭിക്കുമെന്നാണ് പ്രതീക്ഷ, സ്വാമി തുടര്ന്നു.
