തൃശൂര്:തൃശൂര് കുതിരാന് ദേശീയപാതയിലെ സ്വര്ണ കവര്ച്ചയില് പരാതിക്കാരന്റെ വാഹനം ഉപേക്ഷിച്ച നിലയില് .പൂച്ചട്ടിക്കടുത്ത് ആളൊഴിഞ്ഞ പറമ്പിലാണ് വാഹനം കണ്ടെത്തിയത്. അക്രമിസംഘം കാര് തടഞ്ഞുനിര്ത്തി സ്വര്ണ വ്യാപാരിയെയും സുഹൃത്തിനെയും മറ്റു വാഹനങ്ങളില് കയറ്റി കൊണ്ടുപോവുകയായിരുന്നു. അക്രമി സംഘം തട്ടിയെടുത്ത സ്വര്ണ വ്യാപാരി സഞ്ചരിച്ച വാഹനമാണ് ഉപേക്ഷിക്കപ്പെട്ട നിലയില് കണ്ടെത്തിയത്.
അതിനിടെ കേസ് അന്വേഷണത്തിന് പ്രത്യേക സംഘത്തെ നിയോഗിച്ചു. ഒല്ലൂര് ഡിവൈഎസ്പിയുടെ നേതൃത്വത്തില് നാല് സ്ക്വാഡുകള് രൂപീകരിച്ചാണ് അന്വേഷണം. പ്രതികളെ പറ്റി സൂചനകള് ലഭിച്ചെന്നാണ് പൊലീസ് പറയുന്നത്.
കുതിരാന് പാതയില് സ്വര്ണ വ്യാപാരിയുടെ കാര് പിന്തുടര്ന്ന് തടഞ്ഞു നിര്ത്തി രണ്ടരക്കോടിയുടെ സ്വര്ണമാണ് കവര്ന്നത്. മൂന്ന് കാറുകളിലെത്തിയ പത്തംഗ സംഘമാണ് കവര്ച്ചക്ക് പിന്നിലെന്നാണ് പൊലീസ് അറിയിച്ചത്. കോയമ്പത്തൂരില് നിന്ന് തൃശൂരിലേക്ക് കാറില് സ്വര്ണാഭരണവുമായെത്തിയ അരുണ് സണ്ണിയെന്ന സ്വര്ണ വ്യാപാരിയെയും സുഹൃത്ത് റോജി തോമസിനെയുമാണ് ആക്രമിച്ച് സ്വര്ണം തട്ടിയെടുത്തത്.
രാവിലെ പതിനൊന്ന് മണിയോടെ കല്ലിടുക്കില് വച്ചായിരുന്നു സംഭവം. രണ്ട് ഇന്നോവയും മറ്റൊരു വാഹനവും അരുണ് സണ്ണിയുടെ കാറിനെ തടഞ്ഞു.മുന്നില് ഒരു ഇന്നോവ കാര് വട്ടം നിര്ത്തി. രണ്ടാമത്തെ ഇന്നോവ മറ്റൊരു വശത്തിട്ട് ബ്ലോക്ക് ചെയ്തു. മൂന്നാമത്തെ വാഹനം കാറിന്റെ പിന്നില് നിര്ത്തി. വാഹനങ്ങളില് നിന്ന് ചാടിയിറങ്ങിയവര് അരുണ് സണ്ണിയുടെ കാറിലേക്ക് ഓടി കയറി സ്വര്ണവ്യാപാരിയെയും സുഹൃത്തിനെയും കത്തിയും ചുറ്റികയും കാട്ടി ഭീഷണിപ്പെടുത്തി മറ്റു വാഹനങ്ങളിലേക്ക് ബലം പ്രയോഗിച്ച് കയറ്റി. വാഹനങ്ങള് ഹൈവേ വിട്ട് മറ്റു വഴികളിലേക്ക് കയറുന്നതിനിടയില് ഇരുവരെയും മര്ദ്ദിച്ച് സ്വര്ണം എവിടെയെന്ന് ചോദിച്ചറിഞ്ഞു.
സ്വര്ണം കിട്ടിയതിന് പിന്നാലെ റോജിയെ പുത്തൂരിലിറക്കി. അരുണിനെ പാലിയേക്കര ടോളിന് സമീപത്തും ഇറക്കി. അരുണ് ഒല്ലൂര് പൊലീസ് സ്റ്റേഷനിലെത്തി വിവരം അറിയിച്ചതോടെ അന്വേഷണം തുടങ്ങി. അക്രമികള് ആലപ്പുഴ ശൈലിയിലാണ് സംസാരിച്ചിരുന്നത്. മുഖം മൂടി ധരിച്ചിരുന്നു.
