തൃശൂര്:മാധ്യമപ്രവര്ത്തകരെ കയ്യേറ്റം ചെയ്തെന്ന പരാതിയില് കേന്ദ്രസഹമന്ത്രി സുരേഷ് ഗോപിക്കെതിരെ കേസെടുക്കാന് വകുപ്പില്ലെന്ന് പൊലീസ്. ഇക്കാര്യം പൊലീസ് പരാതിക്കാരനായ കോണ്ഗ്രസ് നേതാവും മുന് എം എല് എയുമായ അനില് അക്കരയെ അറിയിച്ചു.
തൃശൂര് എസിപി ആണ് അനില് അക്കരയുടെ പരാതി അന്വേഷിച്ചത്. മാധ്യമപ്രവര്ത്തകരുടെ മൊഴിയെടുത്ത്, തൃശൂര് രാമ നിലയത്തിലെ സിസിടിവി ദൃശ്യങ്ങളും പരിശോധിച്ചു. തുടര്ന്നാണ് കേസെടുക്കേണ്ടതില്ലെന്ന തീരുമാനത്തിലെത്തിയത്.
ഹേമ കമ്മിറ്റി റിപ്പോര്ട്ട് സംബന്ധിച്ച് പ്രതികരണം തേടിയ മാധ്യമ പ്രവര്ത്തകരെ കൈയ്യേറ്റം ചെയ്തെന്നാണ് സുരേഷ് ഗോപിക്കെതിരായ പരാതി.രാമനിലയത്തില് നിന്ന് പുറത്തിറങ്ങവെയായിരുന്നു മാധ്യമപ്രവര്ത്തകര് കേന്ദ്രമന്ത്രിയെ വളഞ്ഞത്. തന്റെ വഴിമുടക്കാന് ആര്ക്കും അവകാശമില്ലെന്ന് പറഞ്ഞ് മന്ത്രി വാഹനത്തില് കയറിയതിനെ തെറ്റായി വ്യാഖ്യാനിക്കുകയായിരുന്നു.
