പിറന്നാൾ ദിനത്തിൽ കേക്ക് വാങ്ങി മടങ്ങുന്നതിനിടെ യുവാവിന് അപകടത്തിൽ ദാരുണാന്ത്യം

പിറവം: പിറന്നാൾ ദിനത്തിൽ യുവാവിന് ദാരുണാന്ത്യം . തിരുമാറാടി കാക്കൂർ കള്ളാട്ടുകുഴി ജങ്‌ഷനു സമീപം മുകളേൽ എം.എം. അനിലിന്റെ മകൻ അതുൽ അനി (22) യാണ് കേക്ക് വാങ്ങി മടങ്ങുന്നതിനിടെ അപകടത്തിൽപ്പെട്ട് മരിച്ചത്. ഒപ്പമുണ്ടായിരുന്ന അമ്മ വത്സ (49) യ്‌ക്കും എതിരേ വന്നിടിച്ച ബൈക്കിലുണ്ടായിരുന്ന കക്കാട് ചെറുകരയിൽ ഷാജു (62), മാന്തടത്തിൽ രാജു (64) എന്നിവർക്കും പരിക്കുണ്ട്.

അഞ്ചൽപ്പെട്ടി – പിറവം റോഡിൽ ഓണക്കൂർ പള്ളിപ്പടിയിൽ ഞായറാഴ്ച ഉച്ചയ്‌ക്കുശേഷം രണ്ടരയോടെയാണ് അപകടം. പിറന്നാൾ കേക്കുംവാങ്ങി പിറവത്ത് കാത്തുനിന്ന അമ്മ വത്സയെയും കൂട്ടി വീട്ടിലേക്ക്‌ പോകുമ്പോഴായിരുന്നു അപകടം. അഞ്ചൽപ്പെട്ടി ഭാഗത്തുനിന്ന് എതിരേ വരുകയായിരുന്ന ബൈക്ക് പള്ളിപ്പടിയിൽ കക്കാട് റോഡിലേക്ക്‌ തിരിക്കുന്നതിനിടയിൽ ഇവരുടെ ബൈക്കുമായി ഇടിക്കുകയായിരുന്നു.

ഗുരുതരമായി പരിക്കേറ്റ അതുലിനെ ഉടൻ പിറവം താലൂക്ക് ആശുപത്രിയിലെത്തിച്ചെങ്കിലും രക്ഷിക്കാനായില്ല. മാറ്റി. ബി.കോം പഠനശേഷം ജർമനിക്കു പോകാനുള്ള തയ്യാറെടുപ്പിലായിരുന്നു അതുൽ.