കവിത
കുഞ്ഞോണം
ഡോ. കൂമുള്ളി ശിവരാമന്
ഓണവില്ലിലൊഴുകിവ-
രും ഓടക്കാറിന് നിറമു
ള്ളോന്! നാവേറുമാ പുള്ളോക്കു-
ടത്തിലൊളിച്ചിരിപ്പോ ഓ-
ണത്തപ്പന് കുടവയറന്!
പഴം നുറുക്കായോ അമ്മ-
ച്ചീ! പപ്പടം കാച്ച്യോ മുത്ത്യേ-
മ്മേ! പായസം വെച്ചോ കുങ്ക്യ-
മ്മേ! കൊതിയായല്ലീ ചോദ്യം!
ഓണമണയോളമായ് കു-
ഞ്ഞി വായില് കപ്പലോട്ടിക്കാന്!
അരയാലിന് കൊമ്പില് ഞാത്തി
ക്കെട്ടും മണിയൂഞ്ഞാലില് ഓ-
ലക്കുടയുമായാരേ! ഞാ-
നല്ല നീയല്ല നമ്മുടെ
വാമന യോമനയുണ്ണി!
മാവേലി മന്നന്റെ സ്വര്ഗ്ഗം!
ആടാം പാടാം അനിയത്തി-
പ്രാവിന് മൂക്കിന് ശുണ്ഠിയില് തൂ-
ങ്ങും തുമ്പപ്പൂ മധുവുണ്ടു
മയങ്ങാമീ ഓണത്തല്ലില്
ഞെട്ടിയുണര്ന്നു ചിരിക്കാം!
ചിങ്ങച്ചിരിയില് ചിനുങ്ങി
ച്ചനുങ്ങിപ്പെയ്യുമോണക്കി-ളീ,
പെയ്തൊഴിഞ്ഞെന്നോ നിന് ക-
ണ്ണീരെല്ലാം! കേള്ക്കട്ടെ സ്നേഹ
ഗീതി തന്നാനന്ദ മേളം!
പൂപ്പൊലി പൂക്കള പൂരം!
