കൊച്ചി: സംസ്ഥാനത്ത് ബിജെപിയുടെ മെമ്പര്‍ഷിപ്പ് കാമ്പയിന് വലിയ പിന്തുണയാണ് ലഭിച്ചു കൊണ്ടിരിക്കുന്നതെന്നും ഈ പ്രവര്‍ത്തനങ്ങള്‍ക്ക് ശേഷം പാര്‍ട്ടി കേരളത്തിലും നിര്‍ണായക ശക്തിയായി മാറുമെന്നും കേന്ദ്ര അഭ്യന്തരവകുപ്പ് സഹമന്ത്രി ബണ്ടി സഞ്ജയ് കുമാര്‍.
ബിജെപി മെമ്പര്‍ഷിപ്പ് കാമ്പയിനിന്റെ ഭാഗമായി എറണാകുളത്ത് പാര്‍ട്ടി ജില്ലാ നേതൃയോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സമൂഹത്തിലെ എല്ലാ വിഭാഗം ജനങ്ങളെയും പാര്‍ട്ടിയില്‍ അംഗമാക്കുന്നതോടൊപ്പം എല്ലാ വിഭാഗങ്ങളുടെയും വിശ്വാസം ആര്‍ജ്ജിക്കുവാനും പ്രവര്‍ത്തകര്‍ ശ്രമിക്കണമെന്നും ബിജെപി മുന്‍ തെലുങ്കാന സംസ്ഥാന അധ്യക്ഷന്‍ കൂടിയായ അദ്ദേഹം സൂചിപ്പിച്ചു.
എറണാകുളം വൈഎംസിഎ ഹാളില്‍ ചേര്‍ന്ന നേതൃയോഗത്തില്‍ ജില്ലാ പ്രസിഡന്റ് അഡ്വ. കെ.എസ്. ഷൈജു അധ്യക്ഷനായി. സംസ്ഥാന വൈസ് പ്രസിഡന്റുമാരായ ഡോ. കെ.എസ്. രാധാകൃഷ്ണന്‍, മേജര്‍ രവി, സംസ്ഥാന സെകട്ടറി ഡോ. രേണു സുരേഷ്, സംസ്ഥാന വക്താക്കളായ അഡ്വ. നാരായണന്‍ നമ്പൂതിരി(ജില്ലാ പ്രഭാരി), കെ.വി.എസ്. ഹരിദാസ്, അഡ്വ. ടി.പി. സിന്ധുമോള്‍, ദേശീയ കൗണ്‍സില്‍ അംഗങ്ങളായ വെള്ളിയാംകുളം പരമേശ്വരന്‍ (ജില്ലാ സഹ പ്രഭാരി), പി.എം. വേലായുധന്‍, ന്യൂനപക്ഷ മോര്‍ച്ച സംസ്ഥാന പ്രസിഡന്റ് ജിജി ജോസഫ്, പദ്മജ വേണുഗോപാല്‍, തെലുങ്കാന സംസ്ഥാന വൈസ് പ്രസിഡന്റ് മനോഹര്‍ റെഡ്ഡി, സംസ്ഥാന വക്താവ് സുഭാഷ്, മേഖലാ സംഘടന സെക്രട്ടറി എല്‍. പദ്മകുമാര്‍, സംസ്ഥാന സമിതിയംഗം എന്‍.പി. ശങ്കരന്‍കുട്ടി, ജില്ലാ ജന. സെക്രട്ടറിമാരായ എസ്. സജി, വി.കെ. ഭസിത്കുമാര്‍ എന്നിവര്‍ പ്രസംഗിച്ചു.
പ്രതികരിക്കാൻ ഇവിടെ എഴുതുക: