ന്യൂദല്ഹി: അതിഷി മര്ലേനയെ ഡമ്മി മുഖ്യമന്ത്രിയെന്ന് വിശേഷിപ്പിച്ച് ആംആദ്മി പാര്ട്ടിയുടെ രാജ്യസഭാ എംപി സ്വാതി മാലിവാള്. പാര്ലമെന്റ് ആക്രമണക്കേസിലെ പ്രതി അഫ്സല് ഗുരുവിനെ വധശിക്ഷയില്നിന്ന് രക്ഷിക്കാന് പോരാട്ടം നടത്തിയവരാണ് അതിഷിയുടെ മാതാപിതാക്കളെന്നും സ്വാതി വിമർശിച്ചു. അതിഷിയെ ദല്ഹി മുഖ്യമന്ത്രിസ്ഥാനത്തേക്ക് നിര്ദേശിച്ചതിന് പിന്നാലെയാണ് രൂക്ഷവിമര്ശനവുമായി സ്വാതി രംഗത്തെത്തിയത്.
വിവാദ പരാമർശങ്ങൾക്ക് പിന്നാലെ സ്വാതി മാലിവാളിനോട് രാജിവെക്കാന് ആവശ്യപ്പെട്ട് എ.എ.പി. ബിജെപിക്ക് വേണ്ടി സ്വാതിക്ക് പാര്ട്ടിയില് തുടരാനാകില്ലെന്ന് എഎപിയുടെ ചീഫ് വിപ്പും മുതിര്ന്ന നേതാവുമായ ദിലീപ് പാണ്ടെ പറഞ്ഞു. പാര്ട്ടിയുടെ എംപിയായി നിന്നുകൊണ്ട് ബിജെപിക്കു വേണ്ടി പണിയെടുക്കാന് കഴിയില്ലെന്നും ധാര്മികതയുണ്ടെങ്കില് രാജി വച്ച് പുറത്തുപോകണമെന്നും അദ്ദേഹം കൂട്ടിച്ചേര്ത്തു.
ഏറെ നാളുകളായി എഎപി നേതൃത്വവുമായി സ്വാതി ഇടഞ്ഞു നില്ക്കുകയാണ്. തന്നെ ആക്രമിക്കാന് ശ്രമിച്ചെന്ന് കാട്ടി കേജരിവാളിന്റെ വിശ്വസ്തനായ വൈഭവ് കുമാറിനെതിരേ കേസ് കൊടുത്തതോടെയാണ് തര്ക്കം രൂക്ഷമായത്.
സാമൂഹിക മാധ്യമത്തില് പങ്കുവെച്ച വീഡിയോയിലൂടെ സ്വാതി പറഞ്ഞത്:-
ദല്ഹിക്ക് അത്രമേല് ദൗര്ഭാഗ്യകരമായ ദിനമാണ് ഇന്ന്. അതിഷിയെ പോലൊരു സ്ത്രീ ദല്ഹിയുടെ മുഖ്യമന്ത്രിയാകാന് പോകുന്നു. ഭീകരവാദിയായ അഫ്സല് ഗുരുവിനെ വധശിക്ഷയില്നിന്ന് രക്ഷിക്കാന് സുദീര്ഘപോരാട്ടം നടത്തിയവരാണ് അവരുടെ കുടുംബം. അയാള് (അഫ്സല് ഗുരു) നിരപരാധിയാണെന്നും തൂക്കിലേറ്റരുതെന്നും രാഷ്ട്രീയ ഗൂഢാലോചനയുടെ ഇരയാണെന്നും പറഞ്ഞ് അവരുടെ (അതിഷി) മാതാപിതാക്കള് പലവട്ടം രാഷ്ട്രപതിക്ക് ദയാഹര്ജികള് സമര്പ്പിച്ചു. എത്രമാത്രം തെറ്റാണിത്. ഇന്ന് അതിഷി മുഖ്യമന്ത്രിയാകും. പക്ഷേ നമുക്കെല്ലാം അറിയാം, അവര് ഒരു ഡമ്മി മുഖ്യമന്ത്രിയായിരിക്കുമെന്ന്. എന്നിരുന്നാലും ഇത് ഒരു പ്രധാനപ്പെട്ട വിഷയമാണ്. കാരണം അവര് മുഖ്യമന്ത്രിയാകും. ഇത് രാജ്യത്തിന്റെയും ഒപ്പം ദല്ഹിയുടെയും സുരക്ഷയുമായി നേരിട്ട് ബന്ധപ്പെട്ടിരിക്കുന്നു. ഇത്തരമൊരു മുഖ്യമന്ത്രിയില്നിന്ന് ദല്ഹിയിലെ ജനങ്ങളെ ദൈവം രക്ഷിക്കട്ടെ…
