ന്യൂദൽഹി : രാജ്യത്തെ ദളിതരുടെയും യുവാക്കളുടെയും സ്ത്രീകളുടെയും ജീവിതം മെച്ചപ്പെടുത്താൻ പ്രധാനമന്ത്രി നരേന്ദ്ര മോദി പ്രവർത്തിക്കുന്നുണ്ടെന്ന് ബിജെപി അധ്യക്ഷൻ ജെപി നദ്ദ. മോദിയുടെ 74-ാം ജന്മദിനത്തോടനുബന്ധിച്ച് ബിജെപി ആസ്ഥാനത്ത് സംഘടിപ്പിച്ച പരിപാടിയെ അഭിസംബോധന ചെയ്ത് സംസാരിക്കുകയായിരുന്നു നദ്ദ .
പ്രധാനമന്ത്രിയുടേത് മഹത്തായ വ്യക്തിത്വമാണ്. രാജ്യത്തെയും മനുഷ്യത്വത്തെയും സേവിക്കുന്നതിനായി പ്രധാനമന്ത്രി തന്റെ ജീവിതം സമർപ്പിച്ചു. അദ്ദേഹം ആളുകളുടെ ജീവിതം മാറ്റിമറിക്കുകയും തന്റെ ദൃഢനിശ്ചയത്തെ ഒരു നേട്ടമാക്കി മാറ്റുകയും ചെയ്തുവെന്ന് നദ്ദ പറഞ്ഞു.
കൂടാതെ സേവാ പഖ്വാദയുടെ കീഴിലുള്ള രക്തദാന ക്യാമ്പും പ്രധാനമന്ത്രിയുടെ ജീവിതത്തെക്കുറിച്ചുള്ള പ്രദർശനവും ബിജെപി അധ്യക്ഷൻ ഉദ്ഘാടനം ചെയ്തു. അത്തരമൊരു മഹത്തായ വ്യക്തിയുടെ ജന്മദിനം തങ്ങൾ സേവാ ദിവസ് ആയി ആഘോഷിക്കുന്നുവെന്ന് പറഞ്ഞ് മോദിയുടെ ജന്മദിനത്തിൽ അദ്ദേഹം ദീർഘായുസ്സ് ആശംസിച്ചു.
മുതിർന്ന പൗരന്മാർക്ക് പരിരക്ഷ നൽകുന്ന ആയുഷ്മാൻ ഭാരത് യോജന, ഏകീകൃത പെൻഷൻ പദ്ധതി, 12 പുതിയ സ്മാർട്ട് സിറ്റി പദ്ധതികൾ എന്നിവയ്ക്ക് കേന്ദ്രത്തിന്റെ അംഗീകാരം ലഭിച്ചത് മോദി സർക്കാരിന്റെ സുപ്രധാന നേട്ടങ്ങളാണെന്ന് നദ്ദ പറഞ്ഞു.
മോദി സർക്കാരിന്റെ ആദ്യ 100 ദിവസത്തെ പ്രവർത്തനങ്ങളെ കുറിച്ച് രാജ്യത്തെ ജനങ്ങൾക്ക് മുന്നിൽ എല്ലാ കേന്ദ്ര സർക്കാർ വകുപ്പുകളും കേന്ദ്ര മന്ത്രിമാരും റിപ്പോർട്ട് കാർഡുകൾ അവതരിപ്പിക്കുമെന്നും അദ്ദേഹം പറഞ്ഞു.
