ശാസ്താംകോട്ട: സ്‌കൂട്ടര്‍ യാത്രക്കാരെ കാര്‍ ഇടിച്ചുവീഴ്‌ത്തി രക്ഷപ്പെടുന്നതിനിടെ ഇതിലൊരു യുവതിയുടെ ദേഹത്ത് കൂടി കാര്‍ കയറ്റിയിറക്കി കൊലപ്പെടുത്തിയ സംഭവത്തില്‍ സുഹൃത്തായ യുവാവിനൊപ്പം കാറിലുണ്ടായിരുന്ന യുവ വനിതാ ഡോക്ടറും അറസ്റ്റിലായി.കരുനാഗപ്പള്ളിയിലെ സ്വകാര്യ ആശുപത്രിയില്‍ ഡോക്ടറായ തിരുവനന്തപുരം നെയ്യാറ്റിന്‍കര സ്വദേശിനി ശ്രീക്കുട്ടിയെയാണ് (27) പ്രേരണാക്കുറ്റം ചുമത്തി ശാസ്താംകോട്ട പൊലീസ് അറസ്റ്റ് ചെയ്തത്.
മൈനാഗപ്പള്ളി ആനൂര്‍ക്കാവില്‍ സ്‌കൂട്ടറില്‍ സഞ്ചരിച്ചിരുന്ന പഞ്ഞിപ്പുല്ലുവിള കുഞ്ഞുമോള്‍ (45) ആണ് ഞായറാഴ്ച വൈകിട്ട് കൊല്ലപ്പെട്ടത്. സ്‌കൂട്ടര്‍ ഓടിച്ചിരുന്ന ബന്ധു ഫൗസിയ പരിക്കേറ്റ് ചികിത്സയിലാണ്.
അപകടമുണ്ടാക്കിയ കാര്‍ ഓടിച്ചിരുന്ന കരുനാഗപ്പള്ളി വെളുത്തമണല്‍ ഇടക്കുളങ്ങര പുന്തല തെക്കേതില്‍ മുഹമ്മജ് അജ്മലിനെ (29) ശൂരനാട് പതാരത്തെ ബന്ധുവീട്ടില്‍ നിന്നും തിങ്കളാഴ്ച പുലര്‍ച്ചെ പൊലീസ് അറസ്റ്റ് ചെയ്തു. മനപൂര്‍വമായ നരഹത്യ ഉള്‍പ്പെടെ ഗുരുതരമായ വകുപ്പുകളാണ് ഇയാള്‍ക്കെതിരെ ചുമത്തിയത്. അജ്മല്‍ ചന്ദനക്കടത്ത് ഉള്‍പ്പെടെ അഞ്ചു കേസില്‍ പ്രതിയാണെന്ന് പൊലീസ് പറഞ്ഞു. അപകടം ഉണ്ടായപ്പോള്‍ വീണു കിടന്ന കുഞ്ഞുമോളുടെ ദേഹത്ത് കൂടി കാര്‍ ഓടിച്ചു പോകാന്‍ ശ്രീക്കുട്ടി നിര്‍ബന്ധിച്ചതായുള്ള പ്രദേശവാസികളുടെ മൊഴി പ്രകാരമാണ്് പ്രേരണാകുറ്റം ചുമത്തി കേസെടുത്തത്.
അജ്മലും ശ്രീക്കുട്ടിയും മദ്യപിച്ചിരുന്നെന്നു വൈദ്യപരിശോധനയില്‍ തെളിഞ്ഞതായി പൊലീസ് അറിയിച്ചു. അപകടമുണ്ടാകുന്നതിന് മണിക്കൂറുകള്‍ക്ക് മുന്‍പ്, ഒരു സുഹൃത്തിന്റെ വീട്ടില്‍ വച്ചു മദ്യപിച്ച അജ്മലും ശ്രീക്കുട്ടിയും അവിടെനിന്നു മടങ്ങവെയാണ് അപകടം. മറ്റൊരു സുഹൃത്തും ഇവര്‍ക്കൊപ്പമുണ്ടായിരുന്നെങ്കിലും അപകടത്തിനു തൊട്ടുമുന്‍പ് ഇയാള്‍ കാറില്‍നിന്ന് ഇറങ്ങി.
അപകടം ഉണ്ടായപ്പോള്‍ നാട്ടുകാര്‍ ഓടിക്കൂടുന്നത് കണ്ട് റോഡില്‍ വീണ കുഞ്ഞുമോളുടെ ശരീരത്തിലൂടെ കാര്‍ കയറ്റിയിറക്കി അജ്മലും ശ്രീക്കുട്ടിയും കടന്നു. മുന്നോട്ടു പോയ കാര്‍ മറ്റൊരു വാഹനത്തെ ഇടിക്കാതിരിക്കാന്‍ വെട്ടിച്ച് മാറ്റിയപ്പോള്‍ മതിലിലും മറ്റു രണ്ടു വാഹനങ്ങളിലും ഇടിച്ചു. കരുനാഗപ്പള്ളിയില്‍ വച്ച് പോസ്റ്റിലിടിച്ച് വാഹനം നിന്നതോടെ അജ്മലും ഡോ ശ്രീക്കുട്ടിയും പുറത്തിറങ്ങിയോടി. അജ്മല്‍ മതില്‍ ചാടി രക്ഷപ്പെട്ടു. ശ്രീക്കുട്ടി സമീപമുളള വീട്ടിലേക്ക് ഓടിക്കയറിയെങ്കിലും നാട്ടുകാര്‍ പിടികൂടി പൊലീസില്‍ ഏല്‍പിച്ചു. ഒളിവില്‍ പോയ അജ്മലിനെ കൊല്ലം പതാരത്തുനിന്നാണ് തിങ്കളാഴ്ച പൊലീസ് പിടികൂടിയത്.
പ്രതികരിക്കാൻ ഇവിടെ എഴുതുക: