കാലിക്കറ്റ് ഗ്ലോബ്‌സ്റ്റാര്‍സ് സെമിയില്‍; രോഹന്‍ കുന്നുമ്മലിന് സെഞ്ച്വറി

തിരുവനന്തപുരം: കേരളാ ക്രിക്കറ്റ് ലീഗില്‍ പതിനാലാം ദിവസത്തെ ആദ്യ കളിയിൽ കാലിക്കറ്റ് ഗ്ലോബ് സ്റ്റാര്‍സിന് അദാനി ട്രിവാന്‍ഡ്രം റോയല്‍സിനെതിരേ നാലു വിക്കറ്റ് ജയം. ടോസ് നഷ്ടപ്പെട്ട് ആദ്യം ബാറ്റ് ചെയ്ത ട്രിവാന്‍ഡ്രം റോയല്‍സ് കാലിക്കറ്റിനു മുന്നില്‍ വെച്ച 171 റണ്‍സ് വിജയ ലക്ഷ്യം രണ്ടു പന്തുകള്‍ ബാക്കി നില്‌ക്കെ കാലിക്കറ്റ് മറികടന്നു. 58 പന്തില്‍ നിന്ന് 103 റണ്‍സ് നേടിയ ക്യാപ്റ്റന്‍ രോഹന്‍ കുന്നുമ്മലാണ് കാലിക്കറ്റിന്റെ വിജയശില്പി. ആറു സിക്‌സും ഒന്‍പത് ബൗണ്ടറിയും ഉള്‍പ്പെടുന്നതായിരുന്നു രോഹന്റെ ഇന്നിംഗ്‌സ്. സല്‍മാന്‍ നിസാര്‍ -രോഹന്‍ കുന്നുമ്മല്‍ കൂട്ടുകെട്ട് നേടിയ 88 റണ്‍സ് വിജയത്തിന് നിര്‍ണായകമായി. സല്‍മാന്‍ നിസാര്‍ 30 പന്തില്‍ നിന്ന് 34 റണ്‍സ് നേടി. ട്രിവാന്‍ഡ്രത്തിനു വേണ്ടി അവസാന ഓവര്‍ എറിഞ്ഞ അഖിന്‍ സത്താറിന്റെ നാലാം പന്തില്‍ പള്ളം അന്‍ഫല്‍ സിംഗിള്‍ എടുത്താണ് കാലിക്കറ്റിന്റെ വിജയ റണ്‍ കുറിച്ചത്.

ഓപ്പണര്‍ റിയാസ് ബഷീറിന്റെയും ഗോവിന്ദ് പൈയുടേയും അര്‍ധ സെഞ്ചുറികളുടെ മികവില്‍, ട്രിവാന്‍ഡ്രം റോയല്‍സ് നാല് വിക്കറ്റ് നഷ്ടത്തില്‍ 170 റണ്‍സ് നേടി. 54 പന്തില്‍ നിന്നും രണ്ട് സിക്‌സും ഒന്‍പത് ബൗണ്ടറിയും ഉള്‍പ്പെടെ 79 റണ്‍സ് നേടിയ ഗോവിന്ദ് പൈയാണ് ട്രിവാന്‍ഡ്രത്തിന്റെ ടോപ് സ്‌കോറര്‍. ഓപ്പണര്‍ റിയാ ബഷീര്‍ 47 പന്തില്‍ നിന്നു രണ്ട് സിക്‌സും അഞ്ച് ബൗണ്ടറിയും ഉള്‍പ്പെടെ 64 റണ്‍സ് നേടി. രോഹന്‍ കുന്നുമ്മലാണ് പ്ലെയർ ഓഫ് ദി മാച്ച്.

ഇന്നത്തെ വിജയത്തോടെ കാലിക്കറ്റ് ഗ്ലോബ്സ്റ്റാര്‍സ് സെമിയില്‍ ഇടംപിടിച്ചു. പോയിന്റ് പട്ടികയില്‍ കൊല്ലം സെയ്‌ലേഴ്സ് ഒന്നാമതും കാലിക്കറ്റ് ഗ്ലോബ്‌സാറ്റാര്‍സ് രണ്ടാമതുമെത്തി. പ്രഥമ കേരള ക്രിക്കറ്റ് ലീഗിന്റെ ഗ്രൂപ്പ് മത്സരങ്ങൾ തിങ്കളാഴ്ച അവസാനിക്കും. ചൊവ്വാഴ്ച സെമിഫൈനലും ബുധനാഴ്ച ഫൈനലും കാര്യവട്ടം സ്റ്റേഡിയത്തില്‍ നടക്കും