പാലക്കാട്: കെടിഡിസി ചെയര്‍മാനും, മുന്‍ എംഎല്‍എയും, സിഐടിയു ജില്ലാ പ്രസിഡന്റുമായ പി.കെ. ശശിയെ രൂക്ഷമായി വിമര്‍ശിച്ച് സിപിഎം സംസ്ഥാന സെക്രട്ടറി എം.വി. ഗോവിന്ദന്. പാലക്കാട് മേഖല റിപ്പോര്‍ട്ടിങ്ങിലാണ് ശശിക്കെതിരെ ഗുരുതര ആരോപണങ്ങള്‍ ഉന്നയിച്ചത്. സഖാവിന് ചേര്‍ന്ന പണിയല്ല ശശി ചെയ്തത്. ശശിയെ പാര്‍ട്ടിയില്‍ നിന്ന് പുറത്താക്കാത്തത് മുതിര്‍ന്ന നേതാവായതുകൊണ്ടാണെന്നും ഗോവിന്ദന് തുറന്നടിച്ചു. പി.കെ. ശശി ചെയ്തത് നീചമായ പ്രവൃത്തിയാണ്.
സാമ്പത്തിക തട്ടിപ്പുകള്‍ മാത്രമല്ല ശശിക്കെതിരെയുള്ള പരാതി. ജില്ലാ സെക്രട്ടറിയെ കള്ളക്കേസില്‍ കുടുക്കാന്‍ ശശി ശ്രമിച്ചെന്നും, ഇതിന് ഒരു മാധ്യമ പ്രവര്‍ത്തകനുമായി ഗൂഢാലോചന നടത്തിയെന്നും, വ്യാജരേഖകള്‍ നിര്‍മിച്ചുവെന്നതടക്കം ഗുരുതര ആരോപണങ്ങളാണ് ശശിക്കെതിരെ സംസ്ഥാന സെക്രട്ടറി ഉന്നയിച്ചത്. ജില്ലാ സെക്രട്ടറി എ.എന്‍. സുരേഷ്ബാബുവിനെ കള്ളുകേസിലും, സ്ത്രീപീഡന കേസിലും പ്രതിയാക്കാന്‍ ശ്രമിച്ചതിന്റെ തെളിവുകള്‍ ലഭിച്ചെന്നും റിപ്പോര്‍ട്ടിങ്ങിനിടെ വ്യക്തമാക്കി. ശശി പാര്‍ട്ടി ഫണ്ട് ഉള്‍പ്പെടെ തിരിമറി നടത്തിയെന്ന പരാതി അന്വേഷിക്കാനായി നിയോഗിച്ച കമ്മിഷന്‍ നടത്തിയ പരിശോധനയിലാണ് ജില്ലാ സെക്രട്ടറിക്കെതിരെ നടത്തിയ ഗൂഢാലോചന വ്യക്തമായത്. ഇതുസംബന്ധിച്ച തെളിവുകള്‍ പാര്‍ട്ടിക്ക് ലഭിച്ചതായും റിപ്പോര്‍ട്ടില്‍ പറയുന്നു.
പാര്‍ട്ടിയെ പണമുണ്ടാക്കാനുള്ള ഉപാധിയായി മാത്രം ഉപയോഗിച്ചു. പലവട്ടം തിരുത്താന്‍ അവസരം നല്കി. എന്നാല്‍ അദ്ദേഹം തിരുത്താന്‍ തയ്യാറായില്ല. പാര്‍ട്ടിയുണ്ടെങ്കിലേ നേതാക്കളുള്ളൂവെന്നും എം.വി. ഗോവിന്ദന് വ്യക്തമാക്കി.
ജില്ലാ കമ്മിറ്റിയില്‍ നിന്നും ബ്രാഞ്ചിലേക്ക് തരംതാഴ്‌ത്തപ്പെട്ട പി.കെ. ശശി കെടിഡിസി ചെയര്‍മാന്‍ സ്ഥാനത്ത് തുടരുന്നതില്‍ ജില്ലാ നേതൃത്വത്തിന് താല്‍പര്യമില്ല. കെടിഡിസി ചെയര്‍മാന്‍ സ്ഥാനത്ത് നിന്നും സിഐടിയു ജില്ല അധ്യക്ഷ സ്ഥാനത്ത് നിന്നും ശശിയെ മാറ്റണമെന്ന് ജില്ല കമ്മിറ്റി സംസ്ഥാന നേതൃത്വത്തോട് ആവശ്യപ്പെട്ടിരുന്നെങ്കിലും ഇതുവരെയായും തീരുമാനമുണ്ടായിട്ടില്ല. ഉന്നത സ്ഥാനങ്ങളില്‍ നിന്നും മാറ്റിയാല്‍ പാര്‍ട്ടിയിലേക്ക് ഇനിയൊരു തിരിച്ചുവരവ് ശശിക്ക് ഉണ്ടാവില്ല.
പ്രതികരിക്കാൻ ഇവിടെ എഴുതുക: