ബെംഗളൂരു: ദുലീപ് ട്രോഫി ക്രിക്കറ്റില് രണ്ടാം വിജയം ഇന്ത്യ ബി ടീമിന്. ഇന്നലെ നടന്ന കളിയില് ശുഭ്മാന് ഗില് നയിക്കുന്ന ഇന്ത്യ എ ടീമിനെ 76 റണ്സിന് തോല്പ്പിച്ചു.
രണ്ടാം ഇന്നിങ്സോടെ ഇന്ത്യ ബി മുന്നില് വച്ച 275 റണ്സിന്റെ ലക്ഷ്യത്തിലേക്ക് ബാറ്റെടുത്ത ഇന്ത്യ എ 198 റണ്സെടുത്ത് പുറത്തായി. മുകേഷ് കുമാര് നയിക്കുന്ന ഇന്ത്യ ബി ബൗളിങ് നിരയുടെ മികവിന് മുന്നില് ഇന്ത്യ എയ്ക്ക് പിടിച്ചുനില്ക്കാനായില്ല. മുകേഷ് കുമാര് രണ്ട് വിക്കറ്റ് നേടിയപ്പോള് യാഷ് ദയാല് മൂന്ന് വിക്കറ്റ് സംഭാവന ചെയ്തു. നവ്ദീപ് സെയ്നിയും രണ്ട് വിക്കറ്റ് നേടി. ഒപ്പം വാഷിങ്ടണ് സുന്ദര്, നിതീഷ് റെഡ്ഡി എന്നിവരും ഓരോ വിക്കറ്റ് വീതം നേടി. ഇന്ത്യ എയ്ക്കായി തുടര്ച്ചയായ രണ്ടാം മത്സരത്തിലും നായകന് ശുഭ്മാന് ഗില്(21) പരാജയപ്പെട്ടു. കെ.എല്. രാഹുലും(57) ആകാശ് ദീപും(43) നടത്തിയ ഭേദപ്പെട്ട പ്രകടനമാണ് അല്പ്പമെങ്കിലും ആശ്വാസമായത്.
മത്സരത്തില് ടോസ് നഷ്ടപ്പെട്ട് ആദ്യം ബാറ്റ് ചെയ്ത ഇന്ത്യ ബി ടീമിന്റെ മുഷീര് നേടിയ തകര്പ്പന് സെഞ്ചുറി(181)യുടെ ബലത്തില് 321 റണ്സെടുത്തിരുന്നു. ഇതിനെതിരെ ആദ്യ ഇന്നിങ്സില് ഇന്ത്യ എ 231 റണ്സില് ഒതുങ്ങി. രണ്ടാം ഇന്നിങ്സില് ഇന്ത്യ ബി 184 റണ്സെടുത്താണ് 274 റണ്സിന്റെ ലീഡ് നേടിയത്.
ആദ്യ മത്സരത്തില് ഇന്ത്യ ഡിയെ ഇന്ത്യ സി തോല്പ്പിച്ചിരുന്നു.
