കൊച്ചി: നടന് നിവിന് പോളിക്കെതിരെ ബലാത്സംഗ പരാതി ഉന്നയിച്ച നേര്യമംഗലം സ്വദേശിയുടെയും ഭര്ത്താവിന്റെയും വിശദമൊഴി രേഖപ്പെടുത്തി പ്രത്യേക അന്വേഷണ സംഘം. ഇന്നലെ രാവിലെ ആലുവ ക്രൈംബ്രാഞ്ച് ഓഫീസിലേക്കാണ് യുവതിയേയും ഭര്ത്താവിനേയും അന്വേഷണ സംഘം വിളിച്ചുവരുത്തിയത്. ദുബായിയില് വച്ച് നിവിനും സംഘവും തന്നെ ബലാത്സംഗം ചെയ്തുവെന്നായിരുന്നു യുവതിയുടെ പരാതി.
ദുബായിയില് വച്ച് തന്നെ പീഡിപ്പിച്ചുവെന്ന് പരാതിയില് പറയുന്ന ദിവസം നിവിന് കേരളത്തിലുണ്ടായിരുന്നെന്ന് വാദത്തെപ്പറ്റി പോലീസ് അന്വേഷിക്കട്ടേയെന്ന് യുവതി പറഞ്ഞു. നേരത്തെ പരാതിയില് ഗുരുതരമായ പിഴവുണ്ടെന്ന് പോലീസ് കണ്ടെത്തിയിരുന്നു.
യുവതിയുടെ ആരോപണങ്ങളില് ഗൂഢാലോചനയുണ്ടെന്നും വിശദമായ അന്വേഷണം നടക്കണമെന്നും ആവശ്യപ്പെട്ട് നിവിന് പോളി ഡിജിപിക്കും പരാതി നല്കിയിരുന്നു. ഇതിന് പിന്നാലെയാണ് വിശദമായ മൊഴിയെടുത്തത്. കേസില് ആരോപിക്കുന്ന ഡിസംബര് മാസം താന് കേരളത്തില് ഉണ്ടായിരുന്നുവെന്നതിന് തെളിവായി പാസ്പോര്ട്ടിന്റെ പകര്പ്പും ഹാജരാക്കിയിരുന്നു. അതിനിടെ ഡിജിറ്റല് തെളിവുകളടക്കം നിരത്തി വിനീത് ശ്രീനിവാസനും പിന്നാലെ നടിയും അവതാരകയുമായ പാര്വതി ആര്. കൃഷ്ണയും നിവിന് പിന്തുണയുമായി രംഗത്തെത്തിയിട്ടുണ്ട്. പീഡനം നടന്നുവെന്ന് പറയുന്ന ദിവസം പുലര്ച്ചെ വരെ നിവിന് തന്റെ കൂടെയായിരുന്നുവെന്നും പരാതി വ്യാജമെന്നും സംവിധായകന് വിനീത് ശ്രീനിവാസനും വ്യക്തമാക്കിയിരുന്നു.
ബലാത്സംഗം നടന്നുവെന്നു പറയുന്ന കൊച്ചിയിലെ ഷൂട്ടിങ് സെറ്റില് നിവിനോടൊപ്പം നില്ക്കുന്ന ചിത്രമടക്കം പങ്കുവച്ചാണ് പാര്വതി നടന് പിന്തുണയറിച്ചത്. അന്നേ ദിവസം ഷൂട്ട് ചെയ്ത ഒരു വീഡിയോയും യുവനടി ഇതിനോടൊപ്പം പുറത്തുവിട്ടു. വിനീത് ശ്രീനിവാസന് സംവിധാനം ചെയ്ത വര്ഷങ്ങള്ക്ക് ശേഷം സിനിമയില് പാര്വതിയും വേഷമിട്ടിരുന്നു.
ആരോപണം ശരിയല്ലെന്ന കാര്യം ഇതോടെ വ്യക്തമായെങ്കിലും പോലീസ് എല്ലാ സാധ്യതകളും വിഷയത്തില് പരിശോധിക്കുകയാണ്. പരാതിയില് കേസെടുത്തതിന് പിന്നാലെ തന്നെ നിവിന് പോളി ഇത് കളവാണെന്നും ഗൂഢാലോചനയുണ്ടെന്നും പറഞ്ഞ് രംഗത്ത് വന്നിരുന്നു. മറ്റൊരാളും ഇത്തരത്തില് വന്നില്ലെന്നതും അന്ന് ഏറെ ശ്രദ്ധേയമായിരുന്നു.
