കോഴിക്കോട്: വ്യാപാരി മാമി എന്ന മുഹമ്മദ് ആട്ടൂരിന്റെ തിരോധാന കേസ് സിബിഐക്ക് വിടാന് ഡിജിപിക്ക് റിപ്പോര്ട്ട് നല്കിയതായി മലപ്പുറം എസ് പി എസ് ശശിധരന്. കുടുംബത്തിന്റെ ആവശ്യം പരിഗണിച്ചാണ് ശുപാര്ശ നല്കിയത്.
എംഎല്എ പി വി അന്വറിന്റെ ആരോപണങ്ങളോട് പ്രതികരിക്കുന്നില്ലെന്നും എസ് പി പറഞ്ഞു. വലിയ വസ്തു ഇടപാടുകള് നടത്തുന്ന മാമി യുടെ തിരോധനക്കേസില് എഡിജിപി എംആര് അജിത് കുമാറിനെതിരെ ഭരണകക്ഷി എംഎല്എ പി വി അന്വര് തന്നെ ഗുരുതര ആരോപണം ഉന്നയിച്ചിരുന്നു.
ഈ സാഹചര്യത്തിലാണ് മലപ്പുറം എസ് പിയുടെ മേല്നോട്ടത്തിലുള്ള പ്രത്യേക അന്വേഷണ സംഘം കേസ് സിബിഐക്ക് കൈമാറാമെന്ന റിപ്പോര്ട്ട് ഡിജിപിക്ക് നല്കിയത്. സിബിഐ അന്വേഷണം ആവശ്യപ്പെട്ട് നേരത്തെ കുടുംബം നല്കിയ ഹര്ജി വീണ്ടും പരിഗണിക്കുമ്പോള് ഇക്കാര്യത്തിലുള്ള സര്ക്കാര് നിലപാട് അറിയിക്കാന് ഹൈക്കോടതി സ്പെഷ്യല് പബ്ലിക് പ്രോസിക്യൂട്ടറോട് കഴിഞ്ഞ ദിവസം ആവശ്യപ്പെട്ടിരുന്നു.
സിബിഐ അന്വേഷണം ആവശ്യപ്പെട്ടുള്ള ഹര്ജി ഹൈക്കോടതി ഇന്നലെ വീണ്ടും പരിഗണിച്ചപ്പോള് എഡിജിപിക്കെതിരായ ആരോപണമുള്പ്പെടെയുള്ള പുതിയ സംഭവവികാസങ്ങളും അഭിഭാഷകന് കോടതിയുടെ ശ്രദ്ധയില് പെടുത്തി.പുതിയ വിവാദങ്ങള് ഞെട്ടിപ്പിക്കുന്നതാണെന്നും പ്രത്യേക അന്വേഷണസംഘത്തില് വിശ്വാസമില്ലെന്നും കുടുംബം പ്രതികരിച്ചിരുന്നു.
മാമിയെ കാണാതാകുന്നത് 2023 ആഗസ്റ്റ് 21 നാണ്. നടക്കാവ് പൊലീസും കോഴിക്കോട് കമ്മീഷണറുടെ മേല്നോട്ടത്തിലുള്ള സ്ക്വാഡും കേസ് അന്വേഷിച്ചെങ്കിലും ഫലമുണ്ടാകാതെ വന്നതോടെ മലപ്പുറം എസ്പിയുടെ മേല്നോട്ടത്തിലുള്ള പ്രത്യേക അന്വേഷണസംഘത്തിന് കേസ് എഡിജിപി എംആര് അജിത്കുമാര് കൈമാറി.
