ന്യൂദല്‍ഹി: ഹരിയാന നിയമസഭാ തെരഞ്ഞെടുപ്പിനുള്ള 67 സ്ഥാനാര്‍ത്ഥികളുടെ ആദ്യ പട്ടിക ബിജെപി പുറത്തിറക്കി. മുഖ്യമന്ത്രി നയാബ് സിങ് സൈനി ലാദ്‌വ മണ്ഡലത്തില്‍ മത്സരിക്കും.
ജ്ഞാന്‍ചന്ദ് ഗുപ്ത, മുന്‍ ആഭ്യന്തരമന്ത്രി അനില്‍ വിജ്, കന്‍വര്‍ പാല്‍ ഗുര്‍ജാര്‍, സുനിത ദുഗ്ഗല്‍, ഭവ്യ ബിഷ്ണോയ്, തേജ്പാല്‍ തന്‍വാര്‍ എന്നിവരാണ് ആദ്യ പട്ടികയിലെ മറ്റ് പ്രമുഖര്‍.
ജ്ഞാന്‍ചന്ദ് ഗുപ്ത പഞ്ച്കുലയില്‍ നിന്നും അനില്‍ വിജ് അംബാല കാന്റില്‍ നിന്നും കന്‍വര്‍ പാല്‍ ഗുര്‍ജാര്‍ ജഗധ്രിയില്‍ നിന്നും സുനിത ദുഗ്ഗല്‍ രതിയയില്‍ നിന്നും ഭവ്യ ബിഷ്‌ണോയി ആദംപൂരില്‍ നിന്നും തേജ്പാല്‍ തന്‍വാര്‍ സോഹ്നയില്‍ നിന്നും മത്സരിക്കും.
കഴിഞ്ഞ ദിവസം കേന്ദ്രമന്ത്രി മനോഹര്‍ ലാല്‍ ഖട്ടറിന്റെ ദല്‍ഹിയിലെ വസതിയില്‍ പാര്‍ട്ടിയുടെ സുപ്രധാന യോഗം ചേര്‍ന്നു.
യോഗത്തില്‍ ബിജെപി ഹരിയാന തെരഞ്ഞെടുപ്പ് ചുമതലയുള്ള ധര്‍മേന്ദ്ര പ്രധാന്‍, കോ-ഇന്‍ചാര്‍ജ് ബിപ്ലബ് ദേവ്, സംസ്ഥാന ഇന്‍ചാര്‍ജ് സതീഷ് പുനിയ, സഹ-ഇന്‍ചാര്‍ജ് സുരേന്ദര്‍ നഗര്‍ തുടങ്ങിയവര്‍ പങ്കെടുത്തു.
ഹരിയാനയിലെ 90 അംഗ നിയമസഭയിലേക്കുള്ള വോട്ടെടുപ്പ് ഒക്ടോബര്‍ അഞ്ചിന് നടക്കും. നാമനിര്‍ദ്ദേശ പത്രിക സമര്‍പ്പിക്കാനുള്ള അവസാന തീയതി 12 ആണ്. വോട്ടെണ്ണല്‍ ഒക്ടോബര്‍ എട്ടിനാണ്.
പ്രതികരിക്കാൻ ഇവിടെ എഴുതുക: