ഗാസ ; ഇസ്രയേലി ബന്ദികളാക്കിയവരുടെ മൃതദേഹങ്ങൾ ഗാസയിൽ കണ്ടെത്തിയതിന് പിന്നാലെ ഭീഷണിയുമായി ഹമാസ് . ഇസ്രായേൽ സൈന്യം സമ്മർദം ചെലുത്തുന്നത് അവസാനിപ്പിച്ചില്ലെങ്കിൽ, ബന്ദികളാക്കിയവരെ ശവപ്പെട്ടിയിലാക്കി ഇസ്രായേലിലേക്ക് അയയ്ക്കുമെന്നാണ് ഹമാസ് ഭീഷണി . തങ്ങളുടെ ആളുകൾക്ക് ഇതിനുള്ള നിർദ്ദേശം നൽകിയിട്ടുണ്ടെന്നും ഹമാസ് ഭീഷണിപ്പെടുത്തി.
ഒരു കരാറും കൂടാതെ സൈനിക സമ്മർദ്ദം ചെലുത്തി ബന്ദികളെ മോചിപ്പിക്കാൻ ഇസ്രായേൽ പ്രധാനമന്ത്രി നെതന്യാഹു ശ്രമിച്ചാൽ അവരെ ശവപ്പെട്ടിയിലാക്കി തിരിച്ചയക്കുമെന്ന് ഖാസിം ബ്രിഗേഡ് വക്താവ് അബു ഉബൈദയാണ് പറഞ്ഞത് . ബന്ദികളാക്കിയവരെ ജീവനോടെ തിരികെ വേണമോ അതോ മൃതദേഹങ്ങൾ തിരികെ വേണമോ എന്ന കാര്യത്തിൽ ഇനി തീരുമാനം കുടുംബത്തിന്റെ കൈകളിലാണ്.
ബന്ദികളുടെ മരണത്തിന് ഉത്തരവാദികൾ നെതന്യാഹുവും സൈന്യവും ആണെന്ന് ഹമാസ് പറഞ്ഞു . ഹമാസ് തുരങ്കങ്ങളിൽ നിന്ന് മൃതദേഹങ്ങൾ കണ്ടെത്തിയ ആറ് ബന്ദികളുടെ തലയ്ക്ക് പിന്നിൽ നിന്ന് വെടിയേറ്റതായി നെതന്യാഹു പറഞ്ഞു. ഓഗസ്റ്റ് 31 നാണ് ഗാസയിലെ ഹമാസിന്റെ തുരങ്കങ്ങളിൽ നിന്ന് 6 ബന്ദികളുടെ മൃതദേഹങ്ങൾ ഇസ്രായേൽ കണ്ടെത്തിയത് . സൈനികർ അവിടെ എത്തുന്നതിന് തൊട്ടുമുമ്പ് ഹമാസ് ബന്ദികളെ ക്രൂരമായി കൊലപ്പെടുത്തിയതായി ഇസ്രായേൽ സൈന്യം പറഞ്ഞിരുന്നു.
പ്രദേശത്ത് 6 ബന്ദികളുടെ സാന്നിധ്യത്തെക്കുറിച്ച് വിവരം ലഭിച്ചതായി ഐഡിഎഫ് അറിയിച്ചിരുന്നു. ഇക്കാരണത്താൽ സൈന്യം അതീവ ജാഗ്രതയോടെയാണ് മുന്നോട്ട് പോയത്. അതിനിടെയാണ് ഹമാസിന്റെ ഒരു തുരങ്കം കണ്ടെത്തിയത് . ഇവിടെ നടത്തിയ അന്വേഷണത്തിൽ ബന്ദികളാക്കിയവരുടെ മൃതദേഹങ്ങൾ കണ്ടെടുത്തു.
251 ഇസ്രായേൽ പൗരന്മാരെ ഹമാസ് ബന്ദികളാക്കിയിരുന്നു. ഇവരിൽ 97 പേർ ഇപ്പോഴും ഹമാസിന്റെ തടവിലാണ്. കഴിഞ്ഞ വർഷം നവംബറിലെ വെടിനിർത്തലിൽ 105 ബന്ദികളെ വിട്ടയച്ചിരുന്നു. 33 പേരാണ് ഇവിടെ മരിച്ചത്.
