തിരുവനന്തപുരം: ഹേമ കമ്മിറ്റി റിപ്പോര്ട്ട് പുറത്ത് വന്ന അന്നു മുതല് സിനിമാ ലോകത്തുള്ള എല്ലാ സ്ത്രീകളും അപമാനിക്കപ്പെട്ടു കൊണ്ടിരിക്കുകയാണെന്ന് ഡബിംഗ് ആര്ട്ടിസ്റ്റ് ഭാഗ്യലക്ഷ്മി . ഏറ്റവും താഴെ തട്ടില് ഉള്ളവര് അപമാനിക്കപ്പെടുന്നവെന്നും ഹേമ കമ്മിറ്റി റിപ്പോര്ട്ട് വന്നത് ഒരു തരത്തില് ദ്രോഹമാണെന്നും ഭാഗ്യലക്ഷ്മി പറഞ്ഞു.
സമൂഹത്തിലും, കുടുംബത്തിലുമുള്ളവരുടെ മുന്നില് അപമാനിക്കപ്പെടുകയാണ്. മുഖം മറച്ചെത്തിയ പെണ്കുട്ടി മാധ്യമങ്ങള്ക്ക് മുന്നില് തനിക്കെതിരെ ഉന്നയിച്ച ആരോപണങ്ങള്ക്കും ഭാഗ്യലക്ഷ്മി മറുപടി പറഞ്ഞു.
മുഖം മറയ്ക്കാതെയാണ് അവരുടെ ആരോപണത്തില് ഇപ്പോള് മറുപടി നല്കുന്നത്. ആരോപണങ്ങള് നേരിടും. അപമാനിച്ചതിന് എതിരെ നിയമ നടപടി സ്വീകരിക്കും. പൊലീസിലും മുഖ്യമന്ത്രിക്കും പരാതി നല്കുമെന്നും ഭാഗ്യലക്ഷ്മി പറഞ്ഞു.
ഇക്കഴിഞ്ഞ 31നാണ് ഫെഫ്കയുടെ കീഴിലുള്ള സംഘടനകളിലെ സ്ത്രീകളുടെ പൊതുയോഗം നടന്നത്. അതില് മുന്ധാരണയോടെ സംസാരിച്ച രണ്ട് പെണ്കുട്ടികള് സംഘടനയെ തകര്ക്കാന് ഉറപ്പിച്ച മട്ടിലാണ് പെരുമാറിയത്. ജോലി സ്ഥലത്ത് ആയാലും പൊതുവിയിടത്തിലായാലും സ്വയം സുരക്ഷ ഉറപ്പാക്കണമെന്നാണ് അവരോട് പറഞ്ഞത്. എന്നാല്, ഇതിനെ വളച്ചൊടിക്കുകയായിരുന്നു അവര് . യോഗത്തില് ഒരക്ഷരം മിണ്ടാത്ത ആളാണ് പുറത്തിറങ്ങി ഞാന് സ്ത്രീ വിരുദ്ധയാണെന്ന് വിളിച്ചു പറഞ്ഞത്. മറ്റു രണ്ടു പേരുടെ പേരുകള് കൂടി അവര് വിളിച്ചുപറഞ്ഞെന്ന് ഭാഗ്യലക്ഷ്മി കൂട്ടിച്ചേര്ത്തു.
കാരവനില് നടിമാര് വസ്ത്രം മാറുന്ന ദൃശ്യങ്ങള് പകര്ത്തുന്നുവെന്ന് പറഞ്ഞ രാധിക ശരത് കുമാര് ഇപ്പോഴും മലര്ന്നു കിടന്നു തുപ്പുകയാണെന്ന് ഭാഗ്യലക്ഷ്മി വിമര്ശിച്ചു. ഡബ്ലിയു സി സി അംഗങ്ങള്െക്കതിരെ ഉളള ആരോപണം അന്വേഷിക്കണമെന്നും ഭാഗ്യലക്ഷ്മി പറഞ്ഞു.
