തിരുവനന്തപുരം: വയനാട് ഉരുള്പൊട്ടല് ദുരന്ത ബാധിതരുടെ ഉള്പ്പെടെ വൈത്തിരി താലൂക്കിലെ വായ്പകളിലുളള റവന്യു റിക്കവറി നടപടികള്ക്ക് മൊറട്ടോറിയം പ്രഖ്യാപിച്ചു. ഇനിയൊരു അറിയിപ്പുണ്ടാകും വരെ ജപ്തി നടപടികള് നിര്ത്തിവെക്കുമെന്നാണ് സര്ക്കാര് ഉത്തരവ്.
കഴിഞ്ഞ ജൂലൈയില് പാസാക്കിയ റവന്യു റിക്കവറി ഭേദഗതി നിയമ പ്രകാരമാണ് സര്ക്കാരിന്റെ നിര്ണായക തീരുമാനം. റവന്യു മന്ത്രി കെ രാജനാണ് സര്ക്കാര് ഉത്തരവിറക്കിയ വിവരം ഫേസ്ബുക്കിലൂടെ അറിയിച്ചത്.
ഉരുള്പൊട്ടലുണ്ടായ ചൂരല്മല, മുണ്ടക്കൈ പ്രദേശങ്ങള് ഉള്പ്പെടുന്ന വൈത്തിരി താലൂക്കിലെ വായ്പകള്,വായ്പാ കുടിശികകള് എന്നിവയിലാണ് എല്ലാതരത്തിലുമുള്ള ജപ്തി നടപടികളും നിര്ത്തിവെക്കാന് ഉത്തരവിറക്കിയത്. നാഷണലൈസ്ഡ്, ഷെഡ്യൂള്ഡ്, കൊമേഴ്സ്യല് ബാങ്കുകള്ക്ക് ഉത്തരവ് ബാധകമാണ്.
സര്ക്കാര് ഉത്തരവിന്റെ പകര്പ്പ് സംസ്ഥാന ബാങ്കേഴ്സ് സമിതിക്കും ജില്ലാ കളക്ടര്ക്കും അയച്ചിട്ടുണ്ട്.
