തിരുവനന്തപുരം: ഭിന്നശേഷിയുള്ള കുഞ്ഞിനും അമ്മക്കും തിരുവനന്തപുരം പോത്തന്കോട് പൊലീസ് സ്റ്റേഷനില് നിന്നും മോശം പെരുമാറ്റവും ബുദ്ധിമുട്ടുകളുമുണ്ടായെന്ന പരാതി ഡി.വൈ.എസ്.പി തലത്തില് അന്വേഷിക്കണമെന്ന് മനുഷ്യാവകാശ കമ്മീഷന്. കമ്മീഷന് അദ്ധ്യക്ഷന് ജസ്റ്റിസ് അലക്സാണ്ടര് തോമസിന്റേതാണ് ഉത്തരവ്.
അന്വേഷണ റിപ്പോര്ട്ട് ഒരു മാസത്തിനകം സമര്പ്പിക്കണമെന്ന് കമ്മീഷന് റൂറല് ജില്ലാ പൊലീസ് മേധാവിക്ക് നിര്ദ്ദേശം നല്കി.സംഭവ ദിവസം സ്റ്റേഷനില് ചുമതലയുണ്ടായിരുന്ന സ്റ്റേഷന് ഹൗസ് ഓഫീസര് രേഖാമൂലം വിശദീകരണം നല്കണം.
നാലാഞ്ചിറ സ്വദേശിനി യുവതി നല്കിയ പരാതിയിലാണ് മനുഷ്യാവകാശ കമ്മീഷന്റെ നടപടി. പരാതിക്കാരിക്കെതിരെ മറ്റൊരാള് പോത്തന്കോട് സ്റ്റേഷനില് സിവില് തര്ക്കം ഉന്നയിച്ച് പരാതി നല്കിയെന്നും രാവിലെ 10 ന് സ്റ്റേഷനിലെത്തിയ തന്നെയും കുഞ്ഞിനെയും ഒരു മണിവരെ കാത്തിരുത്തിയെന്നും പരാതിയിലുണ്ട്. പരാതിക്കാരിയെ അപമാനിക്കുന്ന തരത്തില് പൊലീസുദ്യോഗസ്ഥന് സംസാരിച്ചെന്നും പരാതിയിലുണ്ട്.
നെടുമങ്ങാട് ഡി.വൈ.എസ്.പി യില് നിന്നും മനുഷ്യാവകാശ കമ്മീഷന് റിപ്പോര്ട്ട് വാങ്ങി. സുഖമില്ലാത്ത കുഞ്ഞുമായി പരാതിക്കാരി സ്റ്റേഷനിലെത്തി ബഹളമുണ്ടാക്കിയെന്നാണ് ഡിവൈഎസ്പിയുടെ റിപ്പോര്ട്ട്. എന്നാല് മറ്റൊരു ഡി.വൈ.എസ്.പി യെ കൊണ്ട് ഈ പരാതി അന്വേഷിക്കാനാണ് മനുഷ്യാവകാശ കമ്മീഷന്റെ നിര്ദ്ദേശം.
