തിരുവനന്തപുരം: തദ്ദേശസ്വയംഭരണ വകുപ്പ് പ്രിന്സിപ്പല് ഡയറക്ടര് പുറപ്പെടുവിച്ച പൊതു സ്ഥലംമാറ്റ ഉത്തരവില് കരട് പട്ടികയിലുണ്ടായിരുന്നവരെ ഒഴിവാക്കുകയും അനര്ഹരെ ഉള്പ്പെടുത്തി ചട്ടങ്ങള്ക്കും മാനദണ്ഡങ്ങള്ക്കും വിരുദ്ധമായി സ്ഥലംമാറ്റ ഉത്തരവ് അട്ടിമറിക്കുകയും ചെയ്ത ഉദേ്യാഗസ്ഥര്ക്കെതിരെ നിയമനടപടി സ്വീകരിക്കണമെന്ന് കേരള എന്ജിഒ സംഘ് സംസ്ഥാന ജനറല് സെക്രട്ടറി എസ്. രാജേഷ് ആവശ്യപ്പെട്ടു. തദ്ദേശസ്വയംഭരണ വകുപ്പ് പ്രിന്സിപ്പല് ഡയറക്ടറേറ്റിനു മുന്നില് തിരുവനന്തപുരം നോര്ത്ത് ജില്ലാ കമ്മിറ്റിയുടെ നേതൃത്വത്തില് നടത്തിയ പ്രതിഷേധ ധര്ണ ഉദ്ഘാടനം ചെയ്യുകയായിരുന്നു അദ്ദേഹം.
ഭരണാനുകൂല സംഘടനയുടെ താല്പര്യത്തിനും മറ്റ് സ്വാധീനങ്ങള്ക്കും വഴങ്ങി സ്ഥലംമാറ്റ ഉത്തരവില് ക്രമക്കേടുകള് നടത്തി. ഓണ്ലൈന് സ്ഥലം മാറ്റത്തിന്റെ വിശ്വാസ്യത ഇല്ലാതാക്കിയ കുറ്റക്കാരായവരെ മാറ്റി നിര്ത്തി ഉത്തരവ് പുനഃപരിശോധിക്കണം. അര്ഹരായ ജീവനക്കാര്ക്ക് സ്ഥലംമാറ്റം അനുവദിക്കണമെന്നും അദ്ദേഹം പറഞ്ഞു.
ജില്ലാ പ്രസിഡന്റ് ജി. ഹരികുമാര് അധ്യക്ഷത വഹിച്ചു. സംസ്ഥാന സെക്രട്ടറി എസ്. വിനോദ്കുമാര്, ജോയിന്റ് സെക്രട്ടറി പ്രദീപ് പുള്ളിത്തല, സംസ്ഥാന സമിതി അംഗങ്ങളായ പാക്കോട് ബിജു, ജി.ഡി. അജികുമാര്, ജില്ലാ ഭാരവാഹികളായ ബി.സജീഷ്കുമാര്, സന്തോഷ് അമ്പലത്തലയ്ക്കല്, എസ്.സന്തോഷ് കുമാര് എന്നിവര് സംസാരിച്ചു.
