തിരുവനന്തപുരം: ഭരണകക്ഷി എംഎല്‍എ പി.വി അന്‍വര്‍ ഗുരുതര ആരോപണം ഉന്നയിച്ച സാഹചര്യത്തില്‍ മുഖ്യമന്ത്രിക്ക് തുടരാനുള്ള ധാര്‍മ്മികതയില്ലെന്നും രാജി വയ്‌ക്കണമെന്നും യുവമോര്‍ച്ച സംസ്ഥാന അധ്യക്ഷന്‍ സി.ആര്‍. പ്രഫുല്‍ കൃഷ്ണന്‍ ആവശ്യപ്പെട്ടു.
മുഖ്യമന്ത്രിയുടെ പൊളിറ്റിക്കല്‍ സെക്രട്ടറിയും എഡിജിപി അടക്കമുള്ള ഉന്നത ഉദ്യോഗസ്ഥരും കള്ളക്കടത്ത്, കൊലപാതകം, മയക്കുമരുന്ന് ഇടപാടുകാരുടെ സ്വന്തക്കാരാണെന്നാണ് അന്‍വര്‍ പറഞ്ഞത്. സംസ്ഥാനത്തെ ആഭ്യന്തര വകുപ്പ് തികഞ്ഞ പരാജയമാണെന്നും ആഭ്യന്തര വകുപ്പിനെ തിരുത്താനിറങ്ങുന്ന അന്‍വറും ജലീലും പിണറായി വിജയന്റെ ദൗര്‍ബല്യമാണ് കാണിക്കുന്നതെന്നും പ്രഫുല്‍ കൃഷ്ണന്‍ പറഞ്ഞു.
പി.വി. അന്‍വര്‍ എംഎല്‍എ ഉന്നയിക്കുന്ന ആരോപണങ്ങള്‍ ഗൗരവമുള്ളതാണ്. ഇത് സംബന്ധിച്ച് അന്വേഷണം അനിവാര്യമാണ്. ഭരണകക്ഷി എംഎല്‍എയ്‌ക്ക് ഫോണ്‍ ചോര്‍ത്തലിന് ആരാണ് അനുവാദം കൊടുത്തതെന്ന് മുഖ്യമന്ത്രി പിണറായി വിജയന്‍ തന്നെ വിശദീകരിക്കണമെന്നും പ്രഫുല്‍കൃഷ്ണന്‍ ആവശ്യപ്പെട്ടു. മുഖ്യമന്ത്രി വെറും റബര്‍ സ്റ്റാമ്പായി മാറിയെന്നും അന്‍വറിനും കെ.ടി. ജലീലിനും രഹസ്യ പിന്തുണ കൊടുക്കുന്ന കേരളത്തിലെ സൂപ്പര്‍ മുഖ്യമന്ത്രി യഥാര്‍ത്ഥത്തില്‍ ആരാണെന്ന് സിപിഎം നേതൃത്വം വ്യക്തമാക്കണമെന്നും പ്രഫുല്‍ കൃഷ്ണന്‍ ആവശ്യപ്പെട്ടു.
പ്രതികരിക്കാൻ ഇവിടെ എഴുതുക: