ആറ്റിങ്ങല്‍: മികച്ച സേനയായിരുന്ന കേരള പൊലിസിനെ സിപിഎം ഭരണം അടിമക്കൂട്ടമാക്കി മാറ്റിയെന്ന് മുന്‍ കേന്ദ്രമന്ത്രിയും ബിജെപി ദേശീയ നിര്‍വാഹക സമിതി അംഗവുമായ വി.മുരളീധരന്‍.
സ്ത്രീപീഡകരെയും ഗുണ്ടകളേയും മാഫിയകളേയും സംരക്ഷിക്കുകയാണ് പിണറായിയുടെ പൊലീസ് ചെയ്യുന്നത്. ലൈംഗിക ആരോപണം നേരിട്ട കൊല്ലം എംഎല്‍എ ഉള്‍പ്പെടെയുള്ള വേണ്ടപ്പെട്ടവര്‍ക്ക് എതിരെ പിണറായി വിജയന്റെ പൊലീസ് കേസെടുക്കില്ല. മേയര്‍ക്കെതിരെ കേസെടുക്കാന്‍ മടിക്കുന്ന പൊലീസ്, കെഎസ്ആര്‍ടിസി ഡ്രൈവര്‍ക്കെതിരെ കേസെടുക്കും. പിണറായി പൊലീസിന്റെ പക്ഷപാതപരമായ നിലപാടും ഇരട്ടത്താപ്പും ജനങ്ങള്‍ ഇതിനോടകം തിരിച്ചറിഞ്ഞു കഴിഞ്ഞു.
കൊല കൊമ്പന്‍മാര്‍ക്ക് സ്‌റ്റേഷനുകളുടെ ചുമതല നല്‍കി നിയമം ലംഘിച്ച് ബിജെപിക്കെതിരെ പ്രവര്‍ത്തിക്കാനാണ് നീക്കമെങ്കില്‍ അത് വിലപ്പോകില്ല. ബിജെപി പ്രവര്‍ത്തകര്‍ നിയമം ലംഘിക്കാനല്ല വന്നത്. നിയമം ലംഘിക്കുന്ന ഉദ്യോഗസ്ഥനെ അത് ഓര്‍മ്മപ്പെടുത്താനാണ്. ബിജെപി നേതാക്കളെ കള്ളക്കേസില്‍ കുടുക്കി ഇല്ലാതാക്കാമെന്നത് വ്യാമോഹം മാത്രമാണ്. അങ്ങനെ കരുതുന്നവര്‍ അടിയന്തരാവസ്ഥക്കാലമുള്‍പ്പെടെയുള്ള ചരിത്രം വായിച്ച് പഠിക്കണമെന്നും വി.മുരളീധരന്‍ പറഞ്ഞു. പിണറായി വിജയന്റെ ഇംഗിതം മാത്രം നടക്കുന്ന കാലത്ത് എല്‍ഡിഎഫിനും സിപിഎമ്മിനും പ്രസക്തിയില്ലെന്ന് ജയരാജന് മനസിലായെന്നും വി.മുരളീധരന്‍ പറഞ്ഞു.
പ്രതികരിക്കാൻ ഇവിടെ എഴുതുക: