തിരുവനന്തപുരം: ഭാരത ടീമില് ഇനി ഇടവേളകളില്ലാതെ മലയാളികളുടെ സാന്നിധ്യമുണ്ടാകാന് പോകുന്നതിന്റെ തുടക്കമായിരിക്കും കേരള ക്രിക്കറ്റ് ലീഗെന്ന് ചലച്ചിത്രതാരം മോഹന്ലാല് പറഞ്ഞു. കേരള ക്രിക്കറ്റ് അസോസിയേഷന് സംഘടിപ്പിക്കുന്ന പ്രഥമ കേരള ക്രിക്കറ്റ് ലീഗിന്റെ ലോഞ്ചിങ് നിര്വഹിക്കുകയായിരുന്നു അദ്ദേഹം.
ക്രിക്കറ്റ് ഒരു കായിക വിനോദത്തിനുമപ്പുറം ലോകമെമ്പാടും ഒരു വികാരമാണെന്ന് മോഹന്ലാല് പറഞ്ഞു. കേരളത്തെ സംബന്ധിച്ചിടത്തോളം ഏറ്റവുമധികം ആരാധകരുള്ള രണ്ട് കായികവിനോദങ്ങള് ക്രിക്കറ്റും ഫുട്ബോളുമാണ്. രണ്ടിന്റേയും ഏതു മത്സരങ്ങള്ക്കും ആവേശത്തോടെയും ആകാംക്ഷയോടെയും കാത്തിരിക്കുന്ന മലയാളികള് ലോകമെമ്പാടുമുണ്ട്. പാടത്തും പറമ്പിലും ഓലമടലും ഓലപ്പന്തുമൊക്കെ ഉപയോഗിച്ച് ക്രിക്കറ്റ് കളിച്ചിരുന്ന ബാല്യമായിരുന്നു തങ്ങളുടേത്. ഇന്നത്തെ തലമുറ ധോണി മുതല് സഞ്ജു സാംസണ് വരെ കയ്യൊപ്പിട്ട ബാറ്റുകളേന്തിയാണ് കളി പഠിക്കാനിറങ്ങുന്നത്. ക്രിക്കറ്റ് പരിശീലിക്കാന് മികച്ച അവസരമാണ് ഇപ്പോള് കേരള ക്രിക്കറ്റ് അസോസിയേഷനും ജില്ലാ ക്രിക്കറ്റ് അസോസിയേഷനുകളും കളിക്കാര്ക്ക് നല്കുന്നത്. കേരളത്തിലുടനീളം പടര്ന്നുകിടക്കുന്ന ഗ്രൗണ്ടുകളും നല്ല പരിശീലകരും ഉള്പ്പെടെയുള്ള നല്ലകാര്യങ്ങളുടെ ഫലമായാണ് ഭാരത ക്രിക്കറ്റില് കേരളത്തിനു മികച്ച പ്രകടനങ്ങള് കാഴ്ചവെക്കാന് പറ്റുന്നതെന്ന് മോഹന്ലാല് ചൂണ്ടിക്കാട്ടി.
ഭാരത വനിതാ ടീമില് ഈ വര്ഷം മിന്നുമണി, ആശാ ശോഭന, സജന സജീവന് എന്നീ മൂന്നു മിടുക്കികള്ക്ക് അവസരം ലഭിച്ചതു തന്നെ കേരള ക്രിക്കറ്റ് അസോസിയേഷന്റെ പ്രവര്ത്തങ്ങള് വിലയിരുത്താന് ധാരാളമാണ്. ഒരുകൂട്ടം ക്രിക്കറ്റ് താരങ്ങളെ സൃഷ്ടിക്കാന് സാധിച്ച കേരള ക്രിക്കറ്റ് അസോസിയേഷന് ഇനിയും ഇക്കാര്യത്തില് ഏറെ കാര്യങ്ങള് ചെയ്യാനുണ്ടെന്നും അതിന് അവര്ക്ക് സാധിക്കുമെന്നും മോഹന്ലാല് പറഞ്ഞു.
ക്രിക്കറ്റ് ലീഗ് ചാംപ്യന്മാര്ക്കുള്ള ട്രോഫി കായികമന്ത്രി വി. അബ്ദുറഹിമാന് അനാവരണം ചെയ്തു. ക്രിക്കറ്റ് ലീഗിനായി തയ്യാറാക്കിയ പ്രത്യേക ഗാനത്തിന്റെ പ്രകാശനവും മോഹന്ലാല് നിര്വഹിച്ചു. കെസിഎ പ്രസിഡന്റ് ജയേഷ് ജോര്ജ് അധ്യക്ഷനായി. കെസിഎ സെക്രട്ടറി വിനോദ് എസ്. കുമാര്, കേരള ക്രിക്കറ്റ് ലീഗ് ചെയര്മാന് നാസര് മച്ചാന്, വനിതാ ക്രിക്കറ്റ് ഗുഡ്വില് അംബാസിഡര് കീര്ത്തി സുരേഷ് എന്നിവരും ഫ്രാഞ്ചൈസി ഉടമകളും ടീം അംഗങ്ങളും ചടങ്ങില് പങ്കെടുത്തു.
