കുടമാളൂര്: ഹോട്ടലിലെ ലിഫ്റ്റിലേക്കു കയറിയ കുടമാളൂര് സ്വദേശിയായ പ്രവാസി ഏഴാം നിലയില് നിന്നു വീണ് മരിച്ചു. കോട്ടയം കുടമാളൂര് വാതക്കോടത്ത് പരേതനായ രാമചന്ദ്രന് നായരുടെ മകന് രഞ്ജിത്ത് ബാബു (45) വാണ് മരിച്ചത്. ഇദ്ദേഹവും ഭാര്യയും ബിസിനസ് ആവശ്യത്തിന് സൂറത്തില് എത്തിയതായിരുന്നു.
സൂറത്തിലെ റിങ് റോഡിലുള്ള ഹോട്ടലിലെ ഏഴാം നിലയിലാണ് താമസിച്ചിരുന്നത്. ദമ്പതികള് ഒരുമിച്ചു പുറത്തു പോയി തിരികെ ഹോട്ടലില് എത്തി. മറന്നു പോയ സാധനം വാങ്ങാന് രഞ്ജിത്ത് മുറിക്കു പുറത്തിറങ്ങി ലിഫ്റ്റിന്റെ ബട്ടന് അമര്ത്തി. ലിഫ്റ്റിന്റെ വാതില് തുറന്നു. എന്നാല് അതിനുള്ളിലെ പഌറ്റ് ഫോം എത്തിയില്ല. അതറിയാതെ ഉള്ളിലേക്കു കടന്ന അദ്ദേഹം ഏഴാം നിലയില് നിന്ന് വീഴുകയായിരുന്നു. ലിഫ്റ്റില് കയറാന് കാത്തു നിന്നവരാണ് വിവരം ഹോട്ടല് അധികൃതരെ അറിയിച്ചത്. ഉടന് ആശുപത്രിയിലെത്തിച്ചെങ്കിലും മരണം സംഭവിച്ചു. മൃതദേഹം സൂറത്ത് സ്മിമര് ഹോസ്പിറ്റല് മോര്ച്ചറിയില്. അപകട വാര്ത്ത അറിഞ്ഞ ഉടനെ കേരളാ സമാജം സൂറത്ത് പ്രവര്ത്തകര് ഹോസ്പിറ്റലില് എത്തി. പോസ്റ്റ്മോര്ട്ടം, പോലീസ് നടപടികള് പൂര്ത്തിയാക്കി. ബന്ധുക്കള് മൃതദേഹം ഏറ്റുവാങ്ങി ഇന്നു നാട്ടില് എത്തിക്കും. സംസ്കാരം വീട്ടുവളപ്പില് പിന്നീട്. രഞ്ജിത് ബാബു ദുബായില് അക്കൗണ്ടന്റാണ്. അവധിക്ക് നാട്ടില് എത്തിയതാണ്. ഭാര്യ ലക്ഷ്മി (തിരുവല്ല വള്ളംകുളം). മക്കള് അനാന, അനായ.
