കൊച്ചി: ഹേമ കമ്മിറ്റി റിപ്പോര്ട്ടും തുടര്ന്ന് ഉണ്ടായ കോലാഹലങ്ങളിലും നിശബ്ദത പാലിച്ച ഫെഫ്കയെ വിമര്ശിച്ച് സംഘടനയില് നിന്നും രാജിവച്ച.സംവിധായകന് ആഷിഖ് അബുവിന് മറുപടിയുമായി ഫെഫ്ക. ദിവസങ്ങള്ക്ക് മുമ്പ് അംഗത്വം പുതുക്കാന് അപേക്ഷിച്ചിട്ട് ഇപ്പോള് രാജിപ്രഖ്യാപിച്ചത് വിചിത്രമെന്നാണ് ഫെഫ്കയുടെ പക്ഷം.
പ്രതിഫല പ്രശ്നത്തില് ഇടപെട്ടതിന് ഡയറക്ടേഴ്സ് യൂണിയന് 20 ശതമാനം കമ്മിഷന് ആവശ്യപ്പെട്ടെന്നത് വ്യാജ പ്രചാരണമെന്ന് ഫെഫ്ക വെളിപ്പെടുത്തി.2018ല് കാരണംകാണിക്കല് നോട്ടീസ് നല്കിയിട്ടും ആഷിഖ് അബു ഇതുവരെ പ്രതികരിച്ചിട്ടില്ല.
ആഷിഖ് അബു വരിസംഖ്യയില് 8 വര്ഷമായി കുടിശിക വരുത്തിയെന്നും അംഗത്വം പുതുക്കിയില്ലെന്നും ഫെഫ്ക പറയുന്നു .കുടിശിക പൂര്ണമായും അടച്ചു തീര്ത്തത് ഈ മാസമാണ്. ആഷിഖിന്റെ അംഗത്വം പുതുക്കുന്നത് അടുത്ത എക്സിക്യൂട്ടീവ് ചര്ച്ച ചെയ്യാന് ഇരിക്കെയാണ് രാജി എന്നത് വിചിത്രമാണെന്ന് വാര്ത്താക്കുറിപ്പില് ഫെഫ്ക അറിയിച്ചു.
സിബി മലയിലിനെതിരെ ആഷിക് അബുവിന്റെ ആരോപണം അടിസ്ഥാന രഹിതമാണെന്നത് 2018 ല് തന്നെ തെളിവ് സഹിതം വ്യക്തമാക്കിയിട്ടുണ്ട്. എന്നോ പൊളിഞ്ഞു പോയ വാദങ്ങളാണ് ഇന്നും ആവര്ത്തിക്കുന്നതെന്നും അതില് നിന്ന് തന്നെ സംഘടനയുമായുള്ള അദ്ദേഹത്തിന്റെ വിയോജിപ്പ് ആശയപരമല്ലെന്നും തികച്ചും വ്യക്തിപരമായ ലക്ഷ്യത്തോടു കൂടിയുള്ളതാണെന്നും വ്യക്തമാണെന്ന് ഫെഫ്ക ആരോപിക്കുന്നു.
ഹേമ കമ്മിറ്റി റിപ്പോര്ട്ടില് നിലപാടും തുടര്നടപടികളും സ്വീകരിക്കുന്നതില് ഫെഫ്ക പരാജയപ്പെട്ടെന്ന് ആരോപിച്ചാണ് ആഷിക് അബു രാജി വെച്ചത്. വൈകാരിക പ്രതികരണങ്ങള് പാടില്ലന്ന സംഘടനയുടെ നിലപാട് വേദനിപ്പിച്ചെന്നു് ആഷിക് അബു രാജിക്കത്തില് പറയുന്നുണ്ട്. സിബി മലയിലിനും ബി ഉണ്ണികൃഷ്ണനും എതിരെ രൂക്ഷ വിമര്ശനമാണ് ആഷിക് അബി നടത്തിയത്.
