പണം കിട്ടിയാല് കമ്പനിയുടെ മൂല്യമെന്തെന്ന് നോക്കാതെ എന്ത് പരസ്യത്തിലും നിന്നു കൊടുക്കുന്നവരാണ് താരങ്ങള്. പലപ്പോഴും വിശ്വാസ്യതയില്ലാത്ത കമ്പനികള് വലിയ താരങ്ങളെ പരസ്യത്തിനിറക്കി ഉപഭോക്താക്കളെ വഞ്ചിക്കുകയും പതിവാണ്. എന്നാല് കോടികള് വാഗ്ദാനം ചെയ്തിട്ടും പാന് മസാല പരസ്യത്തിന് മുഖം കാട്ടാന് സമ്മതിക്കാതെ മാതൃകകാട്ടിയിരിക്കുകയാണ് നടന് മാധവന്.
ലഹരി നല്കുന്ന പാന് മസാല ആരോഗ്യത്തിന് ഹാനികരമാണ്. അത് ക്യാന്സര് ഉള്പ്പെടെയുള്ള രോഗങ്ങള്ക്ക് കാരണമാവുകയും ചെയ്യുന്നു. നേരത്തെ ഷാരൂഖ് ഖാന്, ഹൃത്വിക് റോഷന്, അക്ഷയ് കുമാര് തുടങ്ങിയവരെല്ലാം പാന് മസാല പരസ്യങ്ങള്ക്ക് മോഡലായിട്ടുണ്ട്. അതിന്റെ പേരില് അവര് വിമര്ശിക്കപ്പെട്ടിട്ടുമുണ്ട്.
കോടികളാണ് മാധവന് പാന് മസാല കമ്പനികള് വാഗ്ദാനം ചെയ്തത്. എന്നാല് ജനങ്ങളെ വഴിതെറ്റിക്കുന്ന ഉല്പനങ്ങളുടെ പരസ്യത്തിനില്ലെന്ന് പ്രഖ്യാപിക്കുകയായിരുന്നു മാധവന്. നേരത്തെ ബോളിവുഡ് താരം ജോണ് എബ്രഹാമും തെലുങ്ക് താരം അല്ലു അര്ജുനും ഉള്പ്പെടെ ചിലര് പാന് മസാല പരസ്യത്തില് താരങ്ങള് അഭിനയിക്കുന്നതിനെ വിമര്ശിച്ച് രംഗത്ത് വന്നിട്ടുണ്ട്. എന്തായാലും മാധവന്റെ നിലപാട് ഈ രംഗത്ത് വലിയൊരു ചുവടുവെയ്പായി.
