ധാക്ക: ബംഗ്ലാദേശില് ജമാഅത്തെ ഇസ്ലാമിയുടെയും വിദ്യാര്ത്ഥി സംഘടനയായ ഇസ്ലാമി ഛാത ഷിബിറിന്റെയും നിരോധനം പിന്വലിച്ചു. ബംഗ്ലദേശിലെ ഇടക്കാല സര്ക്കാരിന്റേതാണ് നടപടി. ഇതു സംബന്ധിച്ച് ഉത്തരവ് ബുധനാഴ്ചയാണ് പുറപ്പെടുവിച്ചത്. മുന് പ്രധാനമന്ത്രി ഷെയ്ഖ് ഹസീനയുടെ അവാമി ലീഗ് സര്ക്കാര് ഏര്പ്പെടുത്തിയ വിലക്കാണ് ഇപ്പോള് പിന്വലിച്ചിരിക്കുന്നത്.
സംഘടനകള് തീവ്രവാദ പ്രവര്ത്തനങ്ങളില് ഏര്പ്പെടുന്നില്ലെന്ന് വ്യക്തമാക്കിയാണ് വിലക്ക് നീക്കിയത്. ജമാഅത്തെ ഇസ്ലാമിക്കോ ഇസ്ലാമി ഛാത്ര ശിബിറിനോ അനുബന്ധ സംഘടനകള്ക്കോ നിരോധനത്തിന് കാരണമായി പറഞ്ഞ തീവ്രവാദ ബന്ധം കണ്ടെത്താനായില്ലെന്ന് ഉത്തരവില് പറയുന്നു. കഴിഞ്ഞ 15 വര്ഷമായി ജമാഅത്തെ ഇസ്ലാമിയെ ബംഗ്ലാദേശില് നിരോധിക്കണമെന്ന് ആവശ്യം ഉയര്ന്നിരുന്നെങ്കിലും അതിലേക്ക് ഷെയ്ഖ് ഹസീന കടന്നിരുന്നില്ല. എന്നാല് രാജ്യത്ത് സംവരണ പ്രക്ഷോഭം പൊട്ടിപ്പുറപ്പെട്ടതിന് പിന്നാലെയാണ് ജമാഅത്തെ ഇസ്ലാമിയെയും വിദ്യാര്ത്ഥി സംഘടനയെയും നിരോധിച്ചതെന്ന് ഇടക്കാല സര്ക്കാരിലെ നിയമോപദേഷ്ടാവായ ആസിഫ് നസ്റുല് പറഞ്ഞു. ഇതോടെ ബംഗ്ലാദേശ് തെരഞ്ഞെടുപ്പില് പങ്കെടുത്തതിന് സംഘടനക്കേര്പ്പെടുത്തിയ വിലക്കും നീങ്ങും.
ആഗസ്ത് ഒന്നിനാണ് ജമാഅത്തെ ഇസ്ലാമി, ഛാത്ര ഷിബിര്, തുടങ്ങി എല്ലാ അനുബന്ധ സംഘടനകളെയും തീവ്രവാദ വിരുദ്ധ നിയമങ്ങള് പ്രകാരം ബംഗ്ലദേശില് നിരോധിച്ചത്. 2013ല് ഹൈക്കോടതി ജമാഅത്തെ ഇസ്ലാമിയുടെ രജിസ്ട്രേഷന് അസാധുവായി പ്രഖ്യാപിക്കുകയും 2018 ഡിസംബര് 7ന് തെരഞ്ഞെടുപ്പ് കമ്മിഷന് അവരുടെ രജിസ്ട്രേഷന് റദ്ദാക്കുകയും ചെയ്തു. ഇതിനെതിരെ ജമാഅത്തെ ഇസ്ലാമി നല്കിയ അപ്പീല് 2023 നവംബര് 19ന് ബംഗ്ലദേശ് സുപ്രീംകോടതി ഡിവിഷന് ബെഞ്ച് തള്ളിക്കളഞ്ഞു. ഇതോടെ തെരഞ്ഞെടുപ്പില് മത്സരിക്കാന് സംഘടനക്ക് സാധിച്ചിരുന്നില്ല.
