തിരുവനന്തപുരം: കേസരി വാരിക സംഘടിപ്പിക്കുന്ന കോണ്ക്ലേവ് ‘ബ്രിഡ്ജിങ് സൗത്ത്’ നാളെ രാവിലെ 10ന് സൗത്ത് പാര്ക്ക് ഹോട്ടലില് തമിഴ്നാട് ഗവര്ണര് ആര്.എന്. രവി ഉദ്ഘാടനം ചെയ്യും. കേന്ദ്രമന്ത്രി ശ്രീപദ് നായിക് സമാപന സമ്മേളനം ഉദ്ഘാടനം ചെയ്യും.
വിഘടനപരമായ ആഖ്യാനങ്ങള് പ്രോത്സാഹിപ്പിക്കുന്നതില് അക്കാദമിക മേഖലയ്ക്കുള്ള പങ്ക്, എന്താണ് ചില മാധ്യമങ്ങള് ദേശവിരുദ്ധമാകാന് കാരണം എന്നീ വിഷയങ്ങളെ അധികരിച്ചുള്ള വിവിധ സെഷനുകളില് ബിജെപി ദേശീയ സംഘടന സെക്രട്ടറി ബി.എല്. സന്തോഷ്, മുന് കേന്ദ്രമന്ത്രി രാജീവ് ചന്ദ്രശേഖര്, പ്രജ്ഞാപ്രവാഹ് ദേശീയ സംയോജകന് ജെ. നന്ദകുമാര്, മുന് അംബാസഡര് ഡോ. ടി.പി. ശ്രീനിവാസന്, മുന് ഡിജിപി ഡോ. ടി.പി. സെന്കുമാര്, മഖന്ലാല് ചതുര്വേദി ജേണലിസം സര്വകലാശാല വൈസ് ചാന്സലര് ഡോ. കെ.ജി. സുരേഷ്, ഓര്ഗനൈസര് ചീഫ് എഡിറ്റര് പ്രഫുല് കേല്ക്കര്, സാമൂഹ്യ നിരീക്ഷകന് ശ്രീജിത്ത് പണിക്കര്, കേസരി മുഖ്യപത്രാധിപര് ഡോ. എന്.ആര്. മധു തുടങ്ങിയവര് വിവിധ സെഷനുകളില് പങ്കെടുക്കും.
ദക്ഷിണഭാരത സംസ്ഥാനങ്ങള്ക്ക് ഉത്തരഭാരത മേഖലയില് നിന്നു വ്യത്യസ്തമായ സംസ്കാരമാണുള്ളതെന്ന് പ്രചരിപ്പിച്ച് ദേശവിരുദ്ധരും നിക്ഷിപ്ത താത്പര്യക്കാരും തുടക്കമിട്ട ‘കട്ടിങ് സൗത്ത്’ ആശയപ്രചരണത്തിന് കേസരിയുടെ നേത്യത്വത്തില് നല്കുന്ന മറുപടിയാണ് ‘ബ്രിഡ്ജിങ് സൗത്ത്’ മീഡിയ കോണ്ക്ലേവുകള്. ദേശവിരുദ്ധ പ്രചരണങ്ങള്ക്കു മറുപടി നല്കുന്നതിനൊപ്പം തീര്ത്ഥയാത്രയിലൂടെയും വിനോദ സഞ്ചാരത്തിലൂടെയും സാംസ്കാരിക ഐക്യം’ എന്ന പ്രമേയം മുന്നിര്ത്തിയാണ് കോണ്ക്ലേവ് സംഘടിപ്പിക്കുന്നത്. കോണ്സ്റ്റിറ്റിയൂഷന് ക്ലബ്ബില് നടന്ന സംഘാടക സമിതി യോഗമാണ് ഭാരതത്തിന്റെ വിവിധ ഭാഗങ്ങളില് കോണ്ക്ലേവുകള് സംഘടിപ്പിക്കാന് തീരുമാനിച്ചതെന്ന് ഭാരവാഹികള് വാര്ത്താസമ്മേളനത്തില് പറഞ്ഞു.
വാര്ത്താസമ്മേളനത്തില് കേസരി മുഖ്യ പത്രാധിപര് ഡോ. എന്.ആര്. മധു, കോണ്ക്ലേവ് സ്വാഗതസംഘം ചെയര്മാന് ഡോ. ടി.പി. സെന്കുമാര്, വൈസ് ചെയര്മാന്മാരായ ജോതിസ് ചന്ദ്രന്, രഞ്ജിത് കാര്ത്തികേയന്, രക്ഷാധികാരി റാണി മോഹന്ദാസ്, വര്ക്കിങ് ചെയര്മാന് എം. ഗോപാല്, ജനറല്സെക്രട്ടറി ഡോ. കെ.എന്. മധുസൂദനന് പിള്ള, ജനറല് കണ്വീനര് തിരൂര് രവീന്ദ്രന് തുടങ്ങിയവര് പങ്കെടുത്തു.
