ലക്നൗ : നാലു വയസുകാരിയെ പീഡിപ്പിച്ച ശേഷം ഒളിവിലായിരുന്ന പ്രതിയെ യുപി പൊലീസ് വെടിവച്ച് വീഴ്ത്തി . അയോധ്യ മഹാരാജ്ഗഞ്ച് കുംഭിയ ഗ്രാമത്തിലാണ് സംഭവം . 35 കാരനായ സൽമാനെയാണ് പൊലീസ് വെടിവച്ച് വീഴ്ത്തിയത് .
പിന്നാക്ക വിഭാഗത്തിൽപ്പെട്ട 4 വയസ്സുകാരിയെയാണ് സൽമാൻ പീഡിപ്പിച്ചത് . ബികാപൂർ പ്രദേശവാസിയാണ് സൽമാൻ . 4 വർഷം മുമ്പാണ് മഹാരാജ്ഗഞ്ച് സ്വദേശിയായ റുബീനയെ വിവാഹം കഴിച്ചത്. സൽമാന്റെ ഒരു വയസുള്ള കുഞ്ഞുമായി കളിക്കാനായി നാലു വയസുകാരി പതിവായി സൽമാന്റെ വീട്ടിലെത്താറുണ്ട് . എന്നാൽ, റുബീന ആശുപത്രിയിൽ പോയ സമയം കളിക്കാനെത്തിയ പെൺ കുഞ്ഞിനെ സൽമാൻ മുറിയിൽ കൊണ്ടുപോയി ക്രൂരമായി പീഡിപ്പിക്കുകയായിരുന്നു. ഏറെ നേരമായിട്ടും പെൺകുട്ടി വീട്ടിൽ തിരിച്ചെത്താത്തതിനെ തുടർന്ന് വീട്ടുകാർ നടത്തിയ തിരച്ചിലിൽ കുട്ടിയെ സൽമാന്റെ വീട്ടുവാതിൽക്കൽ അവശനിലയിൽ കണ്ടെത്തി.
വീട്ടുകാർ സംഭവം പോലീസിൽ അറിയിച്ചു. പോലീസ് സ്ഥലത്തെത്തി സൽമാനെ കണ്ടെത്താൻ തെരച്ചിൽ ആരംഭിച്ചിരുന്നു . അന്വേഷണത്തിൽ താരാപൂർ ഗ്രാമത്തിൽ സൽമാൻ ഒളിച്ചിരിക്കുന്നതായി കണ്ടെത്തി. പിടികൂടാൻ എത്തിയ പോലീസിന് നേരെ സൽമാൻ വെടിയുതിർക്കുകയായിരുന്നു. തുടർന്ന് പൊലീസ് സൽമാന്റെ കാലിൽ വെടിയുതിർത്തു. പരിക്കേറ്റ പ്രതിയെ അറസ്റ്റ് ചെയ്ത് ആശുപത്രിയിൽ പ്രവേശിപ്പിച്ചു. പീഡനത്തിനിരയായ കുട്ടിയും ചികിത്സയിലാണ്.
