കൊച്ചി : സംവിധായകനും ചലച്ചിത്ര അക്കാദമി മുന് ചെയര്മാനുമായ രഞ്ജിത്തിനെതിരെ പൊലീസില് പരാതി നല്കി ബംഗാളി നടി ശ്രീലേഖ മിത്ര. കൊച്ചി സിറ്റി പൊലീസ് കമ്മിഷണര്ക്ക് ഇമെയിലിലൂടെയാണ് പരാതി നല്കിയത്.
കടവന്ത്രയിലെ ഫ്ലാറ്റില് വച്ച് രഞ്ജിത്ത് ലൈംഗികോദ്ദോശ്യത്തോടെ പെരുമാറിയെന്നും ഈ വിവരം ഡോക്യുമെന്ററി സംവിധായകന് ജോഷി ജോസഫിനെ പിറ്റേ ദിവസം തന്നെ അറിയിച്ചിരുന്നതായും ശ്രീലേഖ പരാതിയില് പറയുന്നു. സംഭവത്തില് വിശദമായ അന്വേഷണം നടത്തി നടപടി സ്വീകരിക്കണമെന്നും അവര് ആവശ്യപ്പെട്ടിട്ടുണ്ട്.
‘പാലേരി മാണിക്യം’ എന്ന ചിത്രത്തില് അഭിനയിക്കാന് എത്തിയപ്പോഴാണ് രഞ്ജിത്ത് മോശമായി പെരുമാറിയതെന്നായിരുന്നു ശ്രീലേഖ മിത്രയുടെ ആരോപണം. ആരോപണങ്ങള് നിഷേധിച്ച രഞ്ജിത്, പ്രതിഷേധം ശക്തമായതിന് പിന്നാലെ ഞായറാഴ്ചയാണ് ചലച്ചിത്ര അക്കാദമി ചെയര്മാന് സ്ഥാനം രാജിവച്ചത്.
ആദ്യം പരാതി നല്കില്ലെന്നാണ് ശ്രീലേഖ അറിയിച്ചത്. എന്നാല് സിനിമാ മേഖലയിലെ ലൈംഗികാതിക്രമണങ്ങളെക്കുറിച്ച് കൂടുതല് വെളിപ്പെടുത്തലുകള് വന്നതിനു പിന്നാലെയാണ് ശ്രീലേഖ മിത്ര പൊലീസില് പരാതി നല്കിയത്.
