കൊച്ചി : നടനും എം എല്‍ എയുമായ മുകേഷിന് പുറമെ ജയസൂര്യ, ഇടവേള ബാബു, മണിയന്‍ പിള്ള രാജു, എന്നിവര്‍ക്കെതിരെയും ഗുരുതര ആരോപണങ്ങളുമായി നടി മിനു മുനീര്‍. മുകേഷും ജയസൂര്യയും ശാരീരികമായി അതിക്രമം നടത്തിയെന്ന് മിനു മുനീര്‍ പറഞ്ഞു.
ജയസൂര്യ പറഞ്ഞത് സഹകരിച്ചാല്‍ ഗുണമുണ്ടാകുമെന്നാണ്.ദേ ഇങ്ങോട്ട് നോക്കിയേ എന്ന സിനിമയുടെ സെറ്റില്‍ വച്ചാണ് ജയസൂര്യ മോശമായി പെരുമാറിയത്. അപ്രതീക്ഷിതമായി പിന്നില്‍നിന്ന് കെട്ടിപ്പിടിച്ചശേഷം ശാരീരികമായി ഉപദ്രവിക്കുകയായിരുന്നു എന്ന് മിനു മുനീര്‍ പറഞ്ഞു.
2008 ല്‍ ദേ ഇങ്ങോട്ട് നോക്കിയെ എന്ന ചിത്രത്തിന്റെ ഷൂട്ടിംഗ് സെക്രട്ടേറിയേറ്റില്‍ നടക്കവെ ശുചിമുറിയില്‍ പോയി വരുമ്പോള്‍ ജയസൂര്യ പിന്നില്‍ നിന്ന് വന്ന് കെട്ടിപിടിച്ചു. തിരുവനന്തപുരത്ത് ഫ്‌ലാറ്റുണ്ട്. മിനുവിന് താല്‍പര്യമുണ്ടെങ്കില്‍ പറയണമെന്ന് ജയസൂര്യ പറഞ്ഞു. പറ്റില്ലെന്ന പറഞ്ഞ് ഒഴിയുകയായിരുന്നു.
കലണ്ടര്‍ സിനിമ ചിത്രീകരണത്തിനിടെ ഹോട്ടലില്‍ വെച്ച് മുകേഷ് കടന്നുപിടിച്ചു. താന്‍ എതിര്‍ത്തതോടെ അമ്മയിലെ തന്റെ അംഗത്വ അപേക്ഷ മുകേഷ് ഇടപെട്ട് തള്ളി.മണിയന്‍പിള്ള രാജുവും ഇടവേള ബാബുവും ലൈംഗിക ബന്ധത്തിനായി സമ്മര്‍ദ്ദം ചെലുത്തിയിട്ടുണ്ട്.
ഇവര്‍ക്കെതിരെ സര്‍ക്കാര്‍ നിയോഗിച്ച അന്വേഷണ സംഘത്തില്‍ പരാതി നല്‍കുമെന്നും മിനു മുനീര്‍ പറഞ്ഞു.
പ്രതികരിക്കാൻ ഇവിടെ എഴുതുക: