തിരുവനന്തപുരം: ഹേമ കമ്മിറ്റി റിപ്പോര്‍ട്ടിന്റെ അടിസ്ഥാനത്തില്‍ സിനിമാ മേഖലയിലെ ലൈംഗിക ചൂഷണവും ദുരനുഭവങ്ങളും അന്വേഷിക്കാന്‍ സര്‍ക്കാര്‍ പ്രത്യേക പോലീസ് സംഘത്തെ നിയോഗിച്ചു. മുഖ്യമന്ത്രി പിണറായി വിജയന്‍ ഇന്നലെ ഉന്നത പോലീസ് ഉദ്യോഗസ്ഥരുടെ യോഗം വിളിച്ചു ചര്‍ച്ച നടത്തിയതിന്റെ അടിസ്ഥാനത്തിലാണ് നടപടി.
ഐജി സ്പര്‍ജന്‍ കുമാറിന്റെ നേതൃത്വത്തില്‍, ഉയര്‍ന്ന വനിതാ പോലീസ് ഉദ്യോഗസ്ഥര്‍ ഉള്‍പ്പെടുന്ന സംഘത്തെയാണ് നിയോഗിച്ചത്. എസ്. അജിത ബീഗം (ഡിഐജി), മെറിന്‍ ജോസഫ് (എസ്പി ക്രൈംബ്രാഞ്ച് ആസ്ഥാനം), ജി. പൂങ്കുഴലി(എഐജി, കോസ്റ്റല്‍ പോലീസ്), ഐശ്വര്യ ഡോങ്ക്‌റെ(അസി. ഡയറക്ടര്‍ കേരള പോലീസ് അക്കാദമി), അജിത്ത്. വി (എഐജി, ലോ ആന്‍ഡ് ഓര്‍ഡര്‍), എസ്. മധുസൂദനന്‍(എസ്പി ക്രൈംബ്രാഞ്ച്) എന്നിവരാണ് അന്വേഷണ സംഘത്തിലുള്ളത്. അന്വേഷണത്തിന് ക്രൈംബ്രാഞ്ച് എഡിജിപി എച്ച്. വെങ്കിടേഷ് മേല്‍നോട്ടം വഹിക്കും.
പരാതി ഉന്നയിച്ചവരില്‍ നിന്നും മൊഴിയെടുക്കും. പരാതിയില്‍ ഉറച്ചു നിന്നാല്‍ കേസെടുക്കും. പരാതി ഉള്ളവര്‍ക്ക് അന്വേഷണസംഘത്തെ സമീപിക്കാം. അതനുസരിച്ച് കേസെടുക്കും. സമൂഹ മാധ്യമങ്ങളില്‍ അടക്കം ഉയര്‍ന്ന ആക്ഷേപങ്ങള്‍ പരിശോധിക്കും.
പ്രതികരിക്കാൻ ഇവിടെ എഴുതുക