പഞ്ചാബ് കടന്ന് മോഹന്‍ ബഗാന്‍ എസ്ജി

ജംഷെഡ്പുര്‍: ഡ്യൂറന്റ് കപ്പ് ഫുട്‌ബോളില്‍ നിലവിലെ ചാമ്പ്യന്‍മാരായ മോഹന്‍ ബഗാന്‍ സൂപ്പര്‍ ജയന്റ്‌സ് സെമിയില്‍. വാശിയേറിയ പോരാട്ടത്തിനൊടുവില്‍ പഞ്ചാബ് എഫ്‌സിയെ സഡന്‍ ഡെത്തില്‍ കീഴടക്കിയാണ് മോഹന്‍ ബഗാന്‍ ക്വാര്‍ട്ടര്‍ കടന്നത്. നിശ്ചിത സമയ മത്സരം 3-3 സമനിലയില്‍ കലാശിച്ചതിനെ തുടര്‍ന്ന് ക്വാര്‍ട്ടര്‍ പോര് ഷൂട്ടൗട്ടിലേക്കും സഡന്‍ ഡെത്തിലേക്കും നീണ്ടു. ഒടുവില്‍ 6-5ന് മോഹന്‍ ബഗാന്‍ ജയിച്ചു.

ഷൂട്ടൗട്ടിലെ അഞ്ച് വീതം കിക്കുകള്‍ പിന്നിടുമ്പോള്‍ ഇരു ടീമുകളും 4-4  സമനിലയിലായിരുന്നു.

ഷൂട്ടൗട്ടില്‍ നിര്‍ണായകമായ ഏഴാം കിക്കെടുത്ത മോഹന്‍ ബഗാന്‍ താരം ടോം ആല്‍ഡ്രെഡ് പന്ത് ലക്ഷ്യത്തിലെത്തിച്ചതോടെയാണ് അവര്‍ സെമി ഉറപ്പാക്കിയത്.

ആദ്യ അഞ്ച് അവസരത്തില്‍ ഇരു ടീമുകളും ഓരോ കിക്ക് വീതം പാഴാക്കി. സഡന്‍ ഡെത്തിലേക്ക് നീണ്ടപ്പോള്‍ ഏഴാം കിക്ക് പഞ്ചാബ് എഫ്‌സി പാഴാക്കി. തുടര്‍ന്നായിരുന്നു ആല്‍ഡ്രെഡിന്റെ ഗോളില്‍ മോഹന്‍ ബഗാന്‍ വിജയിച്ചത്.

നേരത്തെ 16-ാം മിനിറ്റില്‍ നേടിയ ഗോളില്‍ പഞ്ചാബ് എഫ്‌സി മുന്നിട്ടു നിന്നു. ആദ്യ പകുതി തീരും മുമ്പേ മോഹന്‍ ബഗാന്‍ തിരിച്ചടിച്ചു സമനില പിടിച്ചു.

രണ്ടാം പകുതിയുടെ തുടക്കത്തിലേ മോഹന്‍ ബഗാന്‍ ലീഡ് നേടി. പക്ഷെ എട്ട് മിനിറ്റിനിടെ രണ്ട് ഗോളുകള്‍ നേടി മത്സരം 71 മിനിറ്റിലെത്തിയപ്പോള്‍ പഞ്ചാബ് മോഹന്‍ ബഗാനെ മറികടന്നു. ഈ ആവേശത്തിന് അധികം ആയുസ് ഉണ്ടായില്ല. 79-ാം മിനിറ്റഇല്‍ മോഹന്‍ ബഗാന്‍ വീണ്ടും ഗോള്‍ നേടി സമനില പിടിച്ചു.

ടൂര്‍ണമെന്റില്‍ ഷില്ലോങ് ലാജോങ്ങും നോര്‍ത്ത് ഈസ്റ്റ് യുണൈറ്റഡും ആണ് സെമിയില്‍ പ്രവേശിച്ച മറ്റ് രണ്ട് ടീമുകള്‍.